Blakaj: Besoj se Sorensen do të jetë më proaktiv sa i përket të zhdukurve në Kosovë

Drejtori i Fondit për të Drejtën Humanitare në Kosovë, Bekim Blakaj, beson se ndërmjetësi i ri evropian në dialogun Beograd-Prishtinë, Peter Sorensen, do të jetë më proaktiv në zgjidhjen e fatit të të zhdukurve, i cili mbetet çështje politike dhe jo humanitare.

“Sorenson njoftoi se çështja e parë që do të trajtojë do të jetë çështja e personave të zhdukur, diçka për të cilën është rënë dakord shumë më herët dhe për të cilën kryeministri Kurti dhe presidenti Vuçiq kanë pasur një deklaratë të përbashkët. Besoj se Sorensen do të jetë shumë më proaktiv për këtë çështje sepse palët e shohin qartë këtë çështje si politike, jo humanitare”, ka deklaruar Blakaj për Kosovo online.

Ai është optimist se do të ketë progres, edhe sepse marrëveshja për çështjen e personave të pagjetur parashikon ndërmjetësues të BE-së.

"Parashikohet që ndërmjetësi i BE-së të mund të përdorë edhe disa sanksione nëse konstaton se njëra ose tjetra, ose të dyja palët, nuk po zbatojnë, nuk janë të gatshëm të zbatojnë atë që është rënë dakord. Shpresoj që ai (Peter Sorensen), aq më tepër që së fundmi ka marrë këtë detyrë, do ta shfrytëzojë mandatin e tij për të shtyrë përpara çështjen e personave të pagjetur, pra zgjidhjen e çështjes së personave të pagjetur”, thekson Blakaj.

Ai kujton se Deklarata për Personat e Zhdukur është nënshkruar dy vite më parë dhe se ka qenë momenti i duhur për të filluar zgjidhjen e kësaj çështjeje, por kjo nuk ka ndodhur.

“Më duket se ka qenë një moment i përshtatshëm për të dyja palët dhe për ndërmjetësuesin e mëparshëm, për ta portretizuar atë si një lloj suksesi në një dialog që shumë kohë më parë kishte qenë në një “status quo”. Mendoj se palët e kanë nënshkruar atë marrëveshje vetëm për të treguar se kanë arritur diçka dhe për fat të keq, pas kësaj nuk kemi parë ndonjë zhvillim pozitiv në zgjidhjen e çështjes së personave të pagjetur dhe pothuajse asgjë nga ajo që është rënë dakord nuk është zbatuar në praktikë”, kujton drejtori i Fondit për të Drejtën Humanitare.

Suksesi në vazhdimin e zgjidhjes së çështjes së personave të zhdukur varet nga të dyja palët.

"Por, deri më tani nuk kemi parë ndonjë përparim. Dhe është e qartë se kjo çështje ende po trajtohet si çështje politike. Natyrisht, ky keqkuptim nga ana e palës kosovare për të mos bashkëpunuar me Odaloviqin është pengesë. Por një pengesë tjetër është se pala serbe shumë shpesh e lidh këtë çështje me ngjarjet ditore politike në terren”, përfundon Blakaj.