Blakaj: Prioritet që çështja e personave të zhdukur të trajtohet si humanitare, e jo politike

Drejtori i Fondit për të Drejtën Humanitare, Bekim Blakaj, vlerësoi pas mbajtjes së takimit të parë të Komisionit të Përbashkët të Beogradit dhe Prishtinës në Bruksel për zbatimin e Deklaratës mbi personat e zhdukur, se prioritet duhet të jetë që çështja e të zhdukurve të shihet si humanitare, e jo politike.

Blakaj theksoi se nuk ka pritshmëri të mëdha pas takimit në Bruksel, duke kujtuar se kanë kaluar dy vjet e gjysmë deri në themelimin e Komisionit të Përbashkët, por megjithatë shpreson që disa pika të zbatohen.

“Kjo duhej të ishte bërë menjëherë. Nga ana tjetër, ndoshta disa pika të asaj deklarate të përbashkët të (Aleksandar) Vuçiqit dhe (Albin) Kurtit do të zbatohen, siç është, për shembull, reagimi më i shpejtë kur ka informacione për disa lokacione, që të punohet në terren. Një shkallë më e madhe e përfshirjes së familjeve të personave të zhdukur në punën e Grupit të Përbashkët të Punës. Megjithatë, jam skeptik, sidomos kur bëhet fjalë për hapjen e arkivave të mundshme ku gjenden informacione për lokacionet e mundshme të varrezave, qofshin ato masive apo individuale, nuk shoh se së shpejti do të ketë rezultate konkrete”, tha ai.

Ai theksoi se edhe më herët ka pasur zhgënjime pas marrëveshjeve të arritura.

“Një gjë që gjithashtu përfshihet në Deklaratën e përbashkët është se palët do ta shohin çështjen e personave të zhdukur si humanitare, e jo politike, ndërsa në fakt gjatë gjithë kohës kemi parë se ajo ka qenë monedhë politike për pazare”, tha ai.

Blakaj theksoi se prioritet duhet të jetë që çështja e personave të zhdukur të trajtohet si çështje humanitare dhe jo politike, siç ka qenë deri më tani.

“Mendoj logjikisht se gjithçka që do të kontribuonte në sqarimin e fatit të personave të zhdukur duhet të zbatohet; kjo është jashtëzakonisht e rëndësishme dhe, natyrisht, që çështja e personave të zhdukur të shihet realisht si humanitare e jo politike, kjo duhet të jetë prioritet”, përfundoi ai.