Odalloviq: Me deklarata të papërgjegjshme Kurti tenton të fshehë se Prishtina nuk ka bërë asgjë për personat e zhdukur

Kryetari i Komisionit për Persona të Zhdukur, Velko Odalloviq, ka reaguar ndaj deklaratës së sotme të kryeministrit të Kosovës, Albin Kurti, në prag të Ditës Ndërkombëtare të Personave të Zhdukur, se kërkon hapjen e arkivave të Serbisë për të ndriçuar fati i të zhdukurve dhe theksoi se kryeministri i Kosovës e ka humbur besueshmërinë për të folur për këtë çështje duke pasur parasysh se e ka kthyer në çështje politike, duke ia bartur përgjegjësinë vetëm palës serbe për të mbuluar faktin se Prishtina nuk ka bërë asgjë.

Odalloviq thekson se Kurti asnjëherë nuk i ka thënë se Serbia i ka dorëzuar 2417 dokumente nga arkivat, përmes Komitetit Ndërkombëtar të Kryqit të Kuq, delegacionit të Prishtinës dhe se më shumë se njëqind shqiptarë u janë dorëzuar familjeve të tyre.

“Ne u kemi dhënë skicat tona, hartat, u kemi dhënë pikat ku janë varrosur njerëzit pas konfliktit dhe këtë nuk e përmend sepse nuk i shkon, sepse nëse ai e thoshte këtë, atëherë vetëm atëherë do të shihej transparente se ai nuk ka dhënë asgjë. Ne nuk kemi marrë asnjë informacion nga pala prishtinase dhe me vite nuk kemi qenë në ndonjë lokacion që i plotëson kërkesat tona”, tha Odalloviq për Kosovo online.

Ai beson se deklaratat e papërgjegjshme të Kurtit vetëm sa po e komplikojnë edhe më shumë çështjen, e cila është e dhimbshme si për familjet serbe ashtu edhe për ato shqiptare.

“Sot Albin Kurti nuk tha asgjë të re, përpjekja e tij për t'ia bartur përgjegjësinë Serbisë dhe institucioneve tona fatkeqësisht është diçka që ka vite dhe fatkeqësisht askush nuk po përgjigjet nga ata që duhet t'ia thonë këtë. Me këto deklarata, si për këtë çështje, ashtu edhe për çështjet tjera, ai nuk kontribuon me asgjë që do të mund të zgjidhte ndonjë problem. Me deklarata të tilla ai vetëm sa i ndërlikon gjërat më tej dhe padyshim që ngatërron disa gjëra”, tha Odalloviq për Kosovo online.

Ai ka theksuar se gjithçka që ka folur sot Kurti nuk ka të bëjë me gjendjen faktike.

Sipas tij, është Prishtina në krye me Kurtin që po pengon të gjithë procesin e gjetjes së personave të zhdukur.

“Ai e ka bllokuar procesin në Bruksel dhe nuk dëshiron të ulet të diskutojë për temat që përmendi sot. Sot, ai bëri mjaft komente arbitrare dhe tregoi një histori vërtet boshe. Fakti është se ne po përpiqemi të mbajmë gjallë procesin e gjetjes së personave të zhdukur, se në kuadër të dialogut me Prishtinën po mundohemi që Grupi Punues të funksionojë, sepse kështu është në fund të fundit”, ka theksuar Odalloviq.

Kurti, thekson ai, me sa duket ka harruar se në Deklaratën në Ohër, për të cilën është pajtuar me presidentin Aleksandër Vuçiq, ka pranuar se Grupi Punues është i vetmi mekanizëm i procesit të kërkimit të personave të zhdukur.

Serbia, thotë ai, ka vazhduar me aktivitetet e saj duke respektuar obligimet nga marrëveshjet e marra.

Ai tregoi se një lokacion në Serbi aktualisht është duke u hetuar në fshatin Kozhle, afër Pazarit të Ri në Serbi dhe se të gjitha palët janë të përfshira - familjet e serbëve dhe shqiptarëve, institucionet e Kosovës dhe faktori ndërkombëtar.

“Vetëm dje, për shkak të asaj që përmendi Albin Kurti, ne ftuam në një lokacion përfaqësues të familjeve, shqiptarë dhe serbë, si dhe përfaqësues të institucioneve të përkohshme, anëtarë të grupit punues, por edhe përfaqësues të Komitetit Ndërkombëtar të Kryqit të Kuq, EULEX dhe ekspertë së bashku. Është një vend që është potencialisht ku janë trupat dhe ne i kemi ftuar të gjithë të kërkojnë së bashku. Është një mënyrë jashtëzakonisht e përgjegjshme dhe transparente, pikërisht ashtu siç e kemi bërë deri më tani”, theksoi Odalloviq.

Ai përkujtoi se të dyja palët janë pajtuar në Gjenevë që me kërkesë të Prishtinës të kontrollohen lokacione të caktuara në Serbi dhe anasjelltas, se pala kosovare iu përgjigj pozitivisht kërkesave serbe.

Prishtina është ftuar në të gjitha lokacionet e Serbisë për të marrë pjesë në hetimet për fatin e të zhdukurve, për të dhënë sugjerime, por në asnjë mënyrë nuk mund ta bëjë punën në vend të Serbisë, thekson Odalloviq.

“Po veprojmë me përgjegjësi sipas kërkesave të familjeve të shqiptarëve të Kosovës sepse informacionet që nuk i kanë marrë në mbledhjet e Grupit Punues janë se ekziston një lokacion në Serbi që potencialisht mund të jetë vendndodhja e një varri të zhvendosur, sepse ata kishin njohuri të tilla dhe ne duam të kontrollojmë se çfarë informacioni kemi bashkë. Vendndodhja është shumë e vështirë dhe komplekse. Bëmë rrugë aksesi që kërkonin një përpjekje të jashtëzakonshme. Tani do të vazhdojmë aksionin deri në fund”, tregon Odalloviq.

Në anën tjetër, thekson ai, Prishtina gjatë gjithë kohës i injoron kërkesat e Serbisë, por injoron edhe Grupin Punues, i cili është pjesë e Deklaratës së dakorduar për Personat e Zhdukur nga Ohri.

Ai shtoi se Serbia propozoi në Gjenevë që të formohet një trup i posaçëm i përfaqësuesve të Prishtinës, Beogradit dhe Komitetit Ndërkombëtar të Kryqit të Kuq, i cili do të punojë në kërkimin e arkivave për situata dhe ngjarje specifike, sipas kërkesave të njërës apo tjetrës palë.

“Albin Kurti vetëm harron një gjë. Retorika e tij për kriminelët dhe hetimet nuk ka të bëjë fare me mandatin e Komisionit për Persona të Zhdukur. Komisioni për Persona të Zhdukur nuk ka funksion hetimor, verifikon informacionin dhe kaq. Ne duam të përdorim të gjitha informacionet që dikush dëshiron të ndajë me ne, e që ka për qëllim gjetjen e personave të zhdukur”, shpjegon Odalloviq.

Ai po ashtu ka theksuar se Kurti ka bërë presion që arkivat e UÇK-së të riemërtohen “arkiva vendore”, duke theksuar se këto dokumente duhet të hetohen për të përcaktuar se kush është përgjegjës për krimet ndaj serbëve.

Kurti, thekson ai, asnjëherë nuk ka përmendur një viktimë të vetme serbe, as një krim të kryer nga UÇK-ja dhe asnjëherë nuk i ka thirrur në përgjegjësi ata që i kanë kryer ato krime.

Sipas Odalloviqit, kryeministri i Kosovës e ka anashkaluar se një e treta e 1600 të zhdukurve ishin serbë.

“Ai padyshim e ka humbur besueshmërinë për të folur për këtë temë sepse nuk merret me kërkimin e personave të zhdukur në mënyrë humane dhe civilizuese, përkundrazi e ka kthyer në politikë duke akuzuar ekskluzivisht Serbinë, dhe duke kërkuar që të hapim arkiva të përgjithshme që nuk kanë të bëjnë me kërkimin e personave të zhdukur”, përfundoi Odalloviq.

Ai tha se Kurti duhet t'i kthehet punës normale dhe mekanizmit të kërkimit të personave të zhdukur dhe të mos e përdor këtë çështje për qëllime politike.

“Dita Ndërkombëtare e Personave të Zhdukur është një ditë kur flasim me nderim për të gjitha viktimat, kur duhet t'i trajtojmë të gjitha viktimat në të njëjtën mënyrë. Nuk ka rëndësi nëse nëna është shqiptare apo serbe që ka humbur djalin e saj, ata të dy janë dikush që kërkon të dashurit e tyre dhe ne duhet të kemi një qëndrim serioz ndaj këtyre çështjeve”, beson Odalloviq.