Brnabiq për deklaratën e Kurtit për faturat e papaguara të rrymës në veri të Kosovës: Një gënjeshtër brutale

Kryeministrja serbe Ana Brnabiq thotë se deklarata e kryeministrit të Kosovës Albin Kurti se Serbia “përmes strukturave paralele që kontrollon në veri” e ka dëmtuar Kosovën për qindra milionë euro përmes faturave të papaguara të rrymës dhe shërbimeve komunale, është një gënjeshtër brutale.

“Ky është vetëm një shembull i shkallës dhe guximit të gënjeshtrave të Albin Kurtit. A mund të imagjinohet shkalla në të cilën ai gënjen për gjëra që janë më të vështira për t'u verifikuar dhe më pak të dukshme (dhe më pak të njohura) se kjo? Brutal”, ka shkruar Brnabiq në Twitter.

Drejtori i Zyrës për Kosovë dhe Metohi, Petar Petkoviq, mbrëmë i është përgjigjur me një postim në llogarinë e tij në Twitter sulmeve të Albin Kurtit dhe ministrave të tij ndaj pjesëtarëve të komunitetit serb në veri të Kosovës, ku ka shkruar se vetëm gënjeshtra vijnë nga Kurti.

"Gënjeshtra dhe vetëm gënjeshtra nga Albin Kurti. Beogradi për dy dekada ka mbështetur financiarisht konsumin e energjisë elektrike në veri të Kosovës dhe p.sh. nga nëntori i vitit 2009 deri në dhjetor 2020 kemi ndarë 171 milionë euro për këto qëllime. Kurti le të gjejë një justifikim tjetër për faktin se arkat e tij janë bosh dhe le të pushojë me gënjeshtrat dhe kriminalizimi i serbëve. Përveç kësaj, e vetmja përgjegjëse për moszbatimin e Udhërrëfyesit të Energjisë është Prishtina, e cila nuk dëshiron t'i japë shërbime të shpërndarjes Elektroseverit", ka shkruar Petkoviq dhe i ka bërë thirrje Prishtinës që të ndalojë lajmet e rreme.