Brnabiq: Qëndrimi i qartë i Gjermanisë – BKS duhet të formohet

Kryetarja e Kuvendit të Serbisë, Ana Brnabiq, pas takimeve në Berlin u tha gazetarëve se në të gjitha bisedat me zyrtarët gjermanë ka dëgjuar një qëndrim të qartë të Gjermanisë – se Bashkësia e Komunave Serbe (BKS) duhet të formohet.

“Qëndrimi i Gjermanisë është se Marrëveshja e Brukselit duhet të zbatohet, se ka pasur shumë vonesa dhe se BKS duhet të jetë gjithmonë e para në agjendë. Shpresoj se do të shfaqet në praktikë në një kohë të parashikueshme, edhe pse është vonuar për më shumë se 11 vjet”, u tha Brnabiq gazetarëve në Berlin.

Brnabiq ka vlerësuar se Gjermania e sheh Deklaratën e Kuvendin gjithëserb në mënyrë të njëanshme, si synime separatiste dhe, për fat të keq, nuk sheh asgjë tjetër në gjithë situatën komplekse.

“Duhet shpjeguar se Deklarata që e miratuam në Kuvendin gjithserb, mbi të gjitha, kërkon paqe, stabilitet dhe respekt për të gjitha viktimat e luftërave në BeH. Dhe është gjithashtu një Deklaratë që bën thirrje për respektimin e Marrëveshjes së Paqes të Dejtonit. Marrëveshja e Paqes e Dejtonit flet për BeH si një shtet me dy entitete - me Federatën e BeH dhe Republikën Serbe dhe tre kombet përbërëse dhe Presidencën, e cila përbëhet nga tre anëtarë, të cilët duhet të konsultohen për të gjitha çështjet e politikës së jashtme të BeH-së”, tha Brnabiq.

Ajo përkujtoi se Serbia është një nga nënshkruesit e Marrëveshjes së Paqes të Dejtonit dhe kërkon respektimin e plotë të saj.

Ajo shtoi se kjo nuk dëgjohet shpesh në Gjermani dhe për këtë arsye takime të tilla janë të nevojshme.

“Le t’i hapim të gjitha këto tema pa asnjë frikë apo duke iu shmangur temave të vështira dhe t’i vendosim të gjitha kartat në tavolinë dhe të shpjegojmë. Serbia nuk ka asgjë për të fshehur. Serbia duhet të jetë krenare për gjithçka që kemi bërë. Së fundi, për paqen, stabilitetin dhe lidhjen rajonale. Kështu që u përpoqa t'i nxjerr në pah ato aspekte”, shtoi Brnabiq.

Një bisedë e hapur dhe e sinqertë me Presidentin e Bundestagut

Brnabiq ka deklaruar në Instagram se takimi më i rëndësishëm gjatë vizitës së saj në Gjermani ka qenë me Presidentin e Bundestagut Barbel Bas.

“Më vjen mirë që patëm një bisedë të mirë, të hapur dhe të sinqertë për integrimin tonë evropian, procesin e reformave dhe sundimin e ligjit, si dhe për situatën aktuale në marrëdhëniet në rajonin e Ballkanit Perëndimor”, ka shkruar Brnabiq.

Ajo shtoi se Serbia e sheh Gjermaninë si një nga partnerët më të rëndësishëm, me të cilin dëshiron të punojë për të ruajtur stabilitetin rajonal.

“Ne diskutuam mënyra të ndryshme se si të dy parlamentet tona mund të krijojnë një bashkëpunim më të ngushtë, sepse siç i thashë zonjës Bas, dy prioritetet e mia kryesore janë dialogu i brendshëm në Serbi dhe forcimi i diplomacisë parlamentare”, ka thënë kryetarja e Kuvendit të Serbisë.