Elshani: Aksioni policor si pasojë e aktivitetit ilegal, askush nuk është arrestuar

Drejtori i Policisë kosovare për rajonin e Veriut Veton Elshani ka thënë për Kosovo onlajn se aksioni policor pas bastisjes së pjestarëve të policisë kosovare në zyrat e Bankës së Kursimeve Postare në veri ende po vijon duke shtuar se askush nuk është arrestuar përveçse një personi i cili u shoqërua për në polici në cilësinë e dëshmitarit.

Ai bëri të qartë se policia kishte marrë informacione për aktivitet ilegal në veri pas të cilës policët hyrën në bankë me urdhër të prokurorit dhe me prezencën e përfaqësuesit të administratës tatimore.

"Hyrëm në gjashtë ambjente pune dhe ende nuk kemi mbaruar. Ende punojmë në këtë që gjithçka të jetë e vërtetuar” ka thënë Elshani.

Ky i fundit shtoi se pas kësaj do të konfirmohet nëse rasti do të hetohet nga njësia e krimit ekonomik apo ndonjë njësi tjetër.

Precizoi se policia hyri në ambjentet e punës së BKP në të katër komunat në veri të Kosovës-tre në Mitrovicën e Veriut dhe nga një në Zveçan, Zubin Potok dhe Lleposaviq.

"Një mashkull u shoqërua si dëshmitar për të dhënë dëshminë e tij. Askënd nuk kemi arrestuar", ka thënë Elshani.