Escobar për ndalimin e dinarit: Lëvizjet e njëanshme do të kenë pasoja

I dërguari special i Shteteve të Bashkuara të Amerikës për Ballkanin Perëndimor, Gabriel Escobar, tha sot se vendi e ka plotësisht të qartë se nuk mund të ketë lëvizje të njëanshme dhe se lëvizje të tilla do të kenë pasoja, raporton RTV.

Ai tha për Tanjug, lidhur me vendimin e Prishtinës për shtyrjen e zbatimit të dekretit të BQK-së për ndalimin e dinarit në Kosovë, se këto çështje duhet të komunikohen me afate që nuk prekin popullatën.

"Ne jemi të gatshëm të ndihmojmë në zgjidhjen e problemit, por Beogradi dhe Prishtina duhet të kthehen në dialog dhe të respektojnë marrëveshjet ekzistuese," tha ai.

Sipas tij, shumë nga këto çështje mund të zgjidhen me themelimin e Asociacionit të Komunave Serbe.

I pyetur nëse adresa për të ndihmuar serbët në Kosovë është në Bruksel apo në Uashington, ai theksoi se SHBA-të e mbështesin plotësisht dialogun nën patronazhin e BE-së dhe bëjnë të gjitha përpjekjet për ta vazhduar atë, sepse dialogu është i vetmi kanal për zgjidhje e “çështjeve dypalëshe”.

"Përkrahja jonë teknike, mbështetja jonë ekonomike dhe ndikimi ynë politik janë prapa dialogut. Në fund të fundit, aspirata jonë më e madhe është që Kosova dhe Serbia të anëtarësohen në Bashkimin Evropian. Dhe në ndërkohë të zhvillohen paqësore, produktive dhe efikase marrëdhëniet dypalëshe”, tha Escobar.

Gjithashtu Escobar me rastin e Ditës së Shtetësisë së Serbisë tha se dëshiron të vazhdojë të zhvillojë miqësinë mes dy vendeve.

"Ne kemi bërë shumë në tre vitet e fundit me Marko Gjuriqin këtu dhe duam të vazhdojmë me të. Ai ka bërë shumë për Serbinë dhe do të na mungojë", tha Escobar, i cili ishte i ftuar në pritjen e organizuar nga Ambasada e Serbisë me rastin e Ditës së Shtetësisë në Uashington.