Escobar: Zbatimi i marrëveshjes së Ohrit duhet të nisë menjëherë

Gabriel Escobar, i Dërguari i Posaçëm i Departamentit të Shtetit për Ballkanin Perëndimor, tha sot në një konferencë për shtyp virtual se qëllimi i takimit në Ohër nuk ishte diskutimi i njohjes reciproke, por normalizimi i marrëdhënieve, për të shmangur barrikadat dhe krizat si ajo për targa. 

Escobar tha se marrëveshja e arritur në Ohër dy ditë më parë është ligjërisht e obligueshme, por nuk është nënshkruar.

"Kjo marrëveshje është ligjërisht e obligueshme për të dyja palët. Edhe pse nuk është nënshkruar, është një marrëveshje në çdo kuptim", tha diplomati amerikan.

I pyetur nga Kosova Online nëse mund të ndodhë që marrëveshja e Ohrit të ketë të njëjtin fat si marrëveshjet e Brukselit dhe Uashingtonit, Escobar është shprehur se “është shumë e qartë se rruga e BE-së për të dyja vendet kushtëzohet qartë nga normalizimi i marrëdhënieve”.

"Ne do të shikojmë shumë nga afër se si të mbështesim procesin dhe të inkurajojmë të dy vendet. Ne do të përfshihemi aktivisht në këtë proces", tha Escobar.

Sipas fjalëve të tij, Përfaqësuesi i Lartë i BE-së, Josep Borel, ka bërë të qartë se palët janë angazhuar dhe se zbatimi i marrëveshjes do të ndikojë në rrugën evropiane të të dyjave.

"Marrëveshja është rruga drejt pajtimit të Serbisë dhe Kosovës. Është e rëndësishme që ne të sqarojmë se si do të vazhdojnë të dyja palët. Duhet të nisë menjëherë zbatimi dhe të dyja palët do të përfitojnë prej saj. Besoj se më të rëndësishmet janë integrimet euroatlantike. Ne do të përparojmë vetëm nëse marrëveshja fillon sa më shpejt të zbatohet. Është e rëndësishme për të dyja palët që të zbatohet gjithçka që ka mbetur nga Marrëveshja e Brukselit. Kjo pritet nga të dyja palët. Ne do të vazhdojmë të punojmë me të dyja palët dhe partnerët tanë”, tha ai.

I pyetur nga njëri prej gazetarëve shqiptarë nëse, pas Ohrit, pesë anëtarët e BE-së që nuk e njohin Kosovën tani do ta ndryshojnë vendimin e tyre dhe si e sheh ai, Escobar tha: "Para së gjithash, duhet t'u bëhet pyetja atyre. Shpresojmë që të gjitha vendet e BE-së do ta njohin Kosovën në një të ardhme të afërt. Është e rëndësishme për Kosovën, e cila është pjesë e familjes evropiane, të njihet, gjithashtu shpresojmë që të gjitha vendet e Ballkanit Perëndimor ta njohin njëri-tjetrin dhe të kenë marrëdhëniet të mira. Sa i përket nënshkrimit, ky është një obligim ligjor dhe kjo vlen si për Serbinë ashtu edhe për Kosovën. Historia për nënshkrimin nuk ka ndikim material nëse kemi marrëveshje dhe se të dyja palët kanë hyrë me seriozitet. Fokusimi në nënshkrim është i panevojshëm", tha Escobar, duke shtuar se dialogu do të vazhdojë dhe se do të ketë takime të reja mes Vuçiqit dhe Kurtit.

I pyetur nga gazetarët nëse Vuçiq dhe Kurti kanë diskutuar për anëtarësimin e Kosovës në organizatat ndërkombëtare, përfshirë Kombet e Bashkuara, në takimin në Ohër me përfaqësuesit e BE-së, Escobar tha se SHBA-ja e mbështet fuqishëm dialogun, por se ata nuk janë pjesë e atij procesi.

"Pra, nuk mund t'i përgjigjem pyetjes, sepse nuk kam marrë pjesë në bisedime. Por, mund t'ju them se në takime është diskutuar gjithçka në marrëveshjen bazë dhe në aneks", tha Escobar.