Gjermania ndërpret bashkëpunimin me Kosovën në disa fusha

Gjermania ka vendosur që përkohësisht të lëjë në pauzë bashkëpunimin me Kosovën në sektorë të ndryshëm pasi qeveria me në krye Albin Kurtin nuk ndërmerr hapa për qetësimin e situatës në veri, është thënë për Radion Europa e Lirë nga Ambasada Gjermane në Prishtinë.

Siç bëhet e ditur në përgjigjen e shkruar, Gjermania këtë vendim e ka ndërmarrë në përputhje me politikën e Bashkimit Europian e cila më parë pati vendosur masa ndaj Kosovës.

Vihet në dukje se masat e Gjermanisë nuk do të zbatohen për “projektet me sektorin e shoqërisë civile dhe as për projektet që janë duke u zbatuar”.

“Masat përfshijnë shtyrjen e konsultimeve të qeverisë për bashkëpunimin zhvillimor, ndalimin e partneritetit të planifikuar dypalësh për klimën dhe sigurimin e pajisjeve specifike për ata që ofrojnë siguri” thuhet nga Ambasada Gjermane në Prishtinë.

Theksohet se projektet që janë pezulluar tani, mund të rifillojnë sapo të nisin “masat urgjente për de-eskalim”.

“Gjermania në mënyrë eksplicide mbështet përpjekjet e BE, punën e përfaqësuesit special të BE (Mirosllav) Llajçak, si dhe dialogun e udhëhequr nga BE” precizohet në fund.

Më herët BE ka marrë masa ndaj Kosovës për shkak se Qeveria në Prishtinë ka injoruar kërkesat për de-eskalim të situatës. Disa nga masat e marra nga BE janë pezullimi i përkohshëm i punës së organeve të Marrëveshjes së Stabilizim-Asociimit, pezullohen ftesat për ngjarje të nivelit të lartë, ndërsa vizitat dypalëshe do të pezullohen, përveç atyre që synojnë zgjidhjen e krizës në veriun e Kosovës.

Kryeministri i Kosovës Albin Kurti i quajti këto masa “të padrejta”.

BE ka tre kërkesa ndaj Kosovës, të cilat i përkrahin edhe vendet e tjera perëndimore dhe ato janë de-eskalimi urgjent i situatës në veri, mbajtja e zgjedhjeve të reja dhe kthimi në dialog për normalizimin e marrëdhënieve.