Gjuriq: Lëvizjet agresive të qeverisë Kurti janë përpjekje për të minuar të drejtat kolektive dhe identitetin e serbëve në Kosovë

Veprimet e sotme të koordinuara të qeverisë së Kurtit, të drejtuara kundër institucioneve serbe në Fushë Kosovë, Graçanicë, Lipjan, Hoçë të Madhe, Rahovec, Kushçe dhe shumë enklava të tjera, paraqesin një përshkallëzim të rrezikshëm, tha ministri i punëve të jashtëm Marko Gjuriq.

Gjuriq theksoi se “këto lëvizje agresive nuk janë vetëm një sulm ndaj institucioneve, por një përpjekje e qartë për të minuar të drejtat kolektive dhe identitetin e serbëve në Kosovë”.

“Është e qartë se Kurti po i përdor këto provokime si pjesë e fushatës së tij zgjedhore, duke injoruar të drejtat e njeriut dhe duke mos respektuar marrëveshjet që supozohet se mbrojnë paqen dhe bashkëjetesën. Kjo strategji vetëm sa thellon ndarjet dhe kërcënon stabilitetin në rajon”, ka shkruar Gjuriq në rrjetin social “X”.

Ai shtoi se komuniteti ndërkombëtar nuk duhet të heshtë.

"Duke mbyllur një sy, rrezikon të mbështesë veprimet që i japin përparësi axhendave politike mbi të drejtat themelore të njeriut dhe zbatimin e kornizave të dakorduara. Ne u bëjmë thirrje aktorëve ndërkombëtarë që publikisht dhe pa mëdyshje t'i dënojnë këto veprime, të kërkojnë përfundimin e menjëhershëm të shënjestrim institucional dhe mbrojtjen e të drejtave të serbëve në Kosovë dhe t'i mbajnë të gjitha palët përgjegjëse për marrëveshjet që sigurojnë paqen dhe bashkëjetesën. Tani është koha për veprim. Heshtja është bashkëfajësi”, përfundoi Gjuriq.

Në fund të postimit, Gjuriq etiketoi përfaqësuesin Special të BE-së për Dialogun Beograd-Prishtinë, Miroslav Lajçak, Ministren e Jashtme të BE-së Kaja Kallas, Sekretarin e Shtetit të SHBA-së Anthony Blinken, Sekretarin e Përgjithshëm të OKB-së Antonio Guterres, Komisionin Evropian, OKB-në për të Drejtat e Njeriut, OSBE dhe Ambasadën e SHBA-së në Kosovë.