Gjuriq me Furlasin: Regjimi i Kurtit po përpiqet ta bëjë të padurueshëm jetën e serbëve në Kosovë

Ministri i Punëve të Jashtme të Serbisë, Marko Gjuriq, u takua sot me kryetarin e delegacionit të Parlamentit Evropian në Komitetin Parlamentar për Stabilizim dhe Asociim BE-Serbi, Lukas Furlas, dhe e informoi atë mbi pozitën jashtëzakonisht të vështirë të popullit serb në Kosovë, duke theksuar se regjimi i kryeministrit të Kosovës, Albin Kurti, po përpiqet t’u bëjë serbëve në ato zona kushtet e jetesës të padurueshme.

Gjuriq vlerësoi se veprimet e njëanshme të Prishtinës, presionet e vazhdueshme dhe politika e frikësimit të serbëve janë absolutisht të papranueshme, njoftoi Ministria e Punëve të Jashtme të Serbisë.

“E gjithë kjo e bën situatën shumë të ndërlikuar, për shkak të së cilës dialogu midis Beogradit dhe Prishtinës aktualisht zhvillohet vetëm në nivel teknik. Është e nevojshme të diskutohet se si të vazhdojë procesi i dialogut në një mënyrë kuptimplotë dhe përmbajtësore," theksoi Gjuriq.

Shefi i diplomacisë serbe e uroi Furlasin për zgjedhjen e tij dhe përcolli se Serbia e mbështet plotësisht punën e tij, me qëllim të përparimit në integrimet evropiane.

Ministri falënderoi edhe Furlasin për mbështetjen e tij në procesin e anëtarësimit në Bashkimin Evropian, si dhe për angazhimin e tij për afirmimin sa më të mirë të rezultateve të arritura në atë proces.