Gjuriq: Me qëndrimin ndaj Kosovës, Grenada tregon përkushtimin ndaj parimeve themelore të së drejtës ndërkombëtare dhe Kartës së OKB-së

Ministri i Punëve të Jashtme të Serbisë, Marko Gjuriq, ka zhvilluar një takim në Antigua dhe Barbuda me ministrin e Punëve të Jashtme, Tregtisë, Eksportit dhe Zhvillimit të Grenadës, Xhozef Andal, të cilit i shprehu mirënjohje për qëndrimin e shtetit të tij në lidhje me Kosovën.

Gjuriq dhe Andal diskutuan për forcimin e mëtejshëm të dialogut politik dhe bashkëpunimit ekonomik.

Shefi i diplomacisë serbe e ftoi homologun e tij për një vizitë zyrtare në Serbi, duke theksuar se një vizitë e tillë do të jepte një shtysë shtesë për avancimin e marrëdhënieve ndërmjet dy vendeve.

Gjuriq shprehu mirënjohje për qëndrimin e Grenadës ndaj shpalljes së njëanshme të pavarësisë së Kosovës, duke nënvizuar se me këtë qëndrim, Grenada po tregon përkushtimin ndaj parimeve themelore të së drejtës ndërkombëtare dhe Kartës së OKB-së, thuhet në njoftimin e Ministrisë së Punëve të Jashtme.

Ai gjithashtu përcolli përkushtimin e Serbisë për përmirësimin e bashkëpunimit me Grenadën në kuadër të organizatave ndërkombëtare.

Në takim u diskutua edhe për mundësitë e forcimit të bashkëpunimit në fushën e ekonomisë, dhe Gjuriq shfrytëzoi rastin për të falënderuar Grenadën për vendimin për të marrë pjesë në Ekspozitën e Specializuar Ekspo, duke theksuar se Serbia do të përpiqet të organizojë një Ekspo që do të mbahet mend.

Ministri Gjuriq e ftoi Grenadën të vazhdojë të shfrytëzojë bursat për studentët nga programi "Bota në Serbi" dhe shprehu gatishmërinë për t’iu përgjigjur nevojave të Grenadës në këtë fushë.