Gjuriq me Zijade për seancën e ardhshme të Këshillit të Sigurimit të OKB-së: Një periudhë e shënuar nga veprime të njëanshme nga Prishtina

Ministri i Jashtëm serb Marko Gjuriq është takuar sot me Përfaqësuesen Speciale të Sekretarit të Përgjithshëm të Kombeve të Bashkuara dhe shefen e UNMIK-ut, Karolin Zijade, me të cilën ka diskutuar për situatën në Kosovë dhe seancën e ardhshme të rregullt të Këshillit të Sigurimit të OKB-së për punën e UNMIK-ut, e cila do të mbahet në prill.

Gjatë takimit, Gjuriq vuri në dukje se periudha gjashtëmujore e mbuluar nga raporti i fundit u shënua nga "vazhdimi i veprimeve të njëanshme të Prishtinës kundër popullit serb në Kosovë dhe Metohi dhe incidente të shumta" dhe shprehu pritjen e tij që raporti i ri për punën e UNMIK-ut ta diskutojë këtë në detaje, sipas Ministrisë së Punëve të Jashtme të Serbisë.

Ministri i Jashtëm serb me këtë rast tha se është shumë e rëndësishme që seancat e Këshillit të Sigurimit të OKB-së në të cilat shqyrtohen raportet për punën e UNMIK-ut, të mbeten të hapura për publikun, sepse, siç theksoi ai, ekziston nevoja për njohjen e një auditori më të gjerë ndërkombëtar me sfidat në terren.

Beogradi, sipas Gjuriqit, mbetet qartësisht i përkushtuar për ndërtimin e paqes dhe stabilitetit në Kosovë, duke theksuar se suksesi i atij procesi në masë të madhe do të varet nga "kë do të kemi si bashkëbisedues nga Prishtina në periudhën e ardhshme".

Gjuriq e ka njoftuar bashkëbiseduesin e tij edhe për qëndrimet e Serbisë për marrëveshjen trepalëshe ndërmjet Kroacisë, Shqipërisë dhe Prishtinës për bashkëpunimin e sigurisë, e cila, paralajmëroi ai, shkakton shqetësim të arsyeshëm dhe nuk kontribuon në besimin dhe stabilitetin në rajon.