Gjuriq: Në mbledhjen e Këshillit të Sigurimit të OKB-së penguam planin për t'i fshehur viktimat serbe

Ministri i Punëve të Jashtme i Serbisë, Marko Gjuriq, deklaroi se Serbia në mbledhjen e Këshillit të Sigurimit të OKB-së ka penguar planin e Prishtinës për t'i fshehur viktimat serbe dhe për të fshehur të vërtetën se UÇK ka kryer krime lufte masive, të përhapura dhe jashtëzakonisht brutale në Kosovë.

“U pengua përpjekja për të fshehur faktin se në Kosovë e Metohi, Tiranë dhe në disa vende të tjera, pavarësisht një aktgjykimi të formës së prerë, po kremtohen të akuzuarit për krime lufte, ndërsa bashkësia ndërkombëtare nuk reagon”, tha Gjuriq për RTS-në.

Ai theksoi gjithashtu se në mbledhje u vu në pah fakti se regjimi i Albin Kurtit po pengon votimin e serbëve në zgjedhjet e ardhshme për Kuvendin e Serbisë, duke ndaluar hapjen e vendvotimeve në Kosovë.

“Regjimi i Kurtit e pengon këtë sepse e di se kë mbështesin më së shumti njerëzit. Përveç kësaj, këtu dëgjuam edhe deklarata politikisht obsesive ndaj Aleksandar Vuçiqit dhe anëtarëve të familjes së tij, gjë që duhet të jetë një tjetër sinjal i qartë për qytetarët se kush përbën ndoshta pengesën më të madhe për ambiciet politike të Albin Kurtit”, tha Gjuriq.

Ai theksoi se ishte shumë e pakëndshme të dëgjohej nënçmimi i viktimave serbe nga përfaqësuesi i Prishtinës, duke vënë në dukje se ai, ndryshe nga Glauk Konjufca, kishte përmendur me keqardhje edhe viktimat shqiptare dhe kishte thënë se nuk dëshironte as drejtësi serbe, as shqiptare, por drejtësi objektive, drejtësi për të gjithë.

“Në këtë kontrast të madh, nga përfaqësuesi i Kurtit dëgjuam se viktimat serbe janë trillim. Kjo është mungesë respekti që flet shumë keq për kulturën politike të regjimit të Kurtit, por nuk është befasi”, konstatoi shefi i diplomacisë serbe.

Ai theksoi se, në njëfarë mënyre, ishte mirë që para bashkësisë ndërkombëtare u bë i qartë fakti se, në një moment kur OKB-ja raporton për më shumë se 100 sulme me motive etnike, përfaqësuesi i Prishtinës përgjigjet duke sulmuar pikërisht Kombet e Bashkuara.

“Ata para Këshillit të Sigurimit sulmuan UNMIK-un dhe Sekretarin e Përgjithshëm të OKB-së dhe kjo, sado e pazakontë të jetë, ishte edhe diçka e mirë, që opinioni ndërkombëtar të dëgjonte se me kë kemi të bëjmë”, nënvizoi Gjuriq.

Ai përsëriti përkushtimin e Serbisë ndaj popullit serb në Kosovë dhe theksoi se kujdesi për njerëzit dhe investimet më të mëdha se kurrë do të vazhdojnë.

“Megjithëse disa ankohen se i kemi rritur investimet, ne do t'i rrisim edhe më tej. Në këtë nuk do të na pengojë as Kurti dhe as disa tek ne që do të dëshironin ta paraqisnin diçka të tillë si program politik”, tha Gjuriq.

Ai bëri të ditur se shumë vende në mbledhje kishin mbështetur qëndrimin e Serbisë për disa çështje, duke shprehur mirënjohje ndaj miqve tradicionalë që mbështesin integritetin territorial të Serbisë.

“Integriteti territorial i Serbisë nuk mund të jetë më pak i rëndësishëm se integriteti territorial i Danimarkës, e cila gjithashtu është anëtare e Këshillit të Sigurimit”, theksoi Gjuriq.

Ai shtoi se disa ishin përpjekur të flisnin për Banjskën, duke harruar se në atë incident kishin humbur jetën edhe tre serbë dhe se e vërteta për vdekjen e tyre ende nuk dihet.

“U vra edhe një polic shqiptar, gjë që është për të ardhur keq, por nuk mendoj dhe as nuk pres që në këto rrethana të mund të ketë një proces të drejtë, sepse nuk pati as përpjekje për të përcaktuar përgjegjësinë për plagosjen e dy djemve serbë në prag të Krishtlindjes ortodokse të vitit 2023, kur një pjesëtar aktiv i forcave të sigurisë qëlloi me armë zjarri ndaj një fëmije. Këtë askush nuk e përmend. Unë fola për këtë, sepse nuk duam të heshtim, të ulim kokën dhe të pranojmë se jemi fajtorë dhe përgjegjës për faktin se Kosova e Metohia sot është një zonë aparteidi dhe terrori. Për këtë është përgjegjës regjimi i Albin Kurtit, i cili prej 13 vjetësh refuzon ta formojë Asociacionin e Komunave me Shumicë Serbe”, tha Gjuriq.

Ai insistoi në formimin e Asociacionit edhe gjatë mbledhjes.

“Thashë se fëmija që ka lindur kur u nënshkrua Marrëveshja e Brukselit në vitin 2013, sot është adoleshent, ndërsa AKS ende nuk është formuar. Ne kërkojmë formimin e tij”, përsëriti Gjuriq.

Ai konstatoi gjithashtu se në mbledhje Prishtina foli më shumë për të kaluarën, ndërsa vetëm disa folën për të tashmen dhe shumë pak për të ardhmen.

“Ne shohim një të ardhme në të cilën populli ynë do të jetojë mirë në Kosovë e Metohi, me respektimin e të drejtave dhe në paqe. Por, fatkeqësisht, daullet e konfliktit, urrejtjes dhe së kaluarës vazhdojnë të dëgjohen nga regjimi i Kurtit, madje edhe në organin më të rëndësishëm të Kombeve të Bashkuara”, theksoi Gjuriq.

I pyetur për perspektivat e vazhdimit të dialogut, ai u përgjigj se Serbia jo vetëm që nuk u është shmangur bisedimeve, por ka dëshiruar dialog dhe përparim në marrëdhënie, mirëpo, fatkeqësisht, nuk ka pasur mjaftueshëm palë të gatshme të investojnë në këtë drejtim.

“Është gjithmonë më e lehtë të ndiqet një politikë përplasjesh dhe konfliktesh. Regjimi i Albin Kurtit tregon se nuk ngurron të bëjë asgjë. Por edhe ne kemi treguar se nuk do të ngurrojmë të bëjmë gjithçka për t'i mbrojtur serbët në Kosovë e Metohi. Për ne, paqja dhe stabiliteti janë të shenjta, por edhe mbijetesa e serbëve në Kosovë e Metohi është e shenjtë. Në këtë mbledhje arritëm të gjejmë një ekuilibër në paraqitjen e këtij qëndrimi”, përfundoi Gjuriq.