Hill: Formimi i Bashkimit është një parakusht për të ecur përpara

Ambasadori amerikan në Serbi Kristofer Hill tha sot se formimi i Bashkimit të Komunave Serbe në Kosovë është një element thelbësor për të ecur përpara në dialog, raporton RTV.

Hill tha se së pari kjo duhet të trajtohet në radhë të parë, dhe më pas, siç shtoi ai, vijon ajo që thuhej në propozimin franko-gjerman për Kosovën.

Ai tha gjithashtu se Serbia tani është ndoshta në rrugën më të rëndësishme në historinë e saj - drejt anëtarësimit në integrimet euroatlantike, duke përfshirë BE-në dhe se SHBA duan të ndihmojnë Serbinë për ta realizuar atë.

“Dua të jem i qartë se ne mbështesim të ardhmen e Serbisë. Ne kemi marrëdhëniet më të mira në botë me BE-në dhe Serbia është në rrugë për t'u afruar me të, që është mënyra më e mirë për të forcuar marrëdhëniet tona”, tha Hill në muzeun Nikolla Teslla pas nënshkrimit të Memorandumit të Mirëkuptimit ndërmjet Qeverisë së Serbisë dhe Agjencisë Amerikane për Zhvillim Ndërkombëtar për bashkëpunim në zbatimin e projektit “Energjia më e mirë në Serbi”.

I pyetur se si e sheh formatin e Bashkimit të Komunave Serbe dhe nëse bashkësia ndërkombëtare ka një mekanizëm për ta bindur Prishtinën që të zbatojë marrëveshjen e Brukselit të nënshkruar gati 10 vjet më parë, ai tha se të gjithë negociatorët, qofshin ata nga BE-ja apo SHBA-ja, kanë konfirmuar se BKS është obligim që buron nga Marrëveshja e Brukselit.

“Nëse e lexoni tekstin me kujdes, gjashtë pikat e para kanë të bëjnë me formimin e BKS-së dhe është një element thelbësor për të ecur përpara, dhe kjo duhet të trajtohet në radhë të parë, dhe më pas vijon ajo që thuhet në propozimin franko-gjerman, i cili gëzon mbështetjen e BE-së. Në atë document do të ketë ide më të gjera që do të kërkojnë më shumë kohë”, tha Hill.

Ai shtoi se nuk mund të presim që çdo gjë të zgjidhet sot apo nesër, por se prioriteti i parë është zbatimi i marrëveshjeve të arritura në Bruksel.

I pyetur se si e shohin SHBA-të formatin e BKS-së së ardhshme, nëse është ashtu siç e parashikon Marrëveshja e Brukselit, ai thotë se nuk mund të japë më shumë informacion për të, sepse duhet të përpunohen detajet.

“Marrëveshja e Brukselit ka vetëm gjashtë fjali, për këtë duhet të punohet më shumë dhe të përpunohen detajet”, tha ambasadori amerikan.

I pyetur nga mediat nëse “Plani Ishinger” po rikthehet në skenë përmes propozimit franko-gjerman, ai tha se fillimisht duhet fokusuar në përmbajtjen e planit ekzistues dhe se më vonë mund të krahasohen dhe të kërkohen ngjashmëritë dhe dallimet mes dy planeve.