Ibishi: Rasti i Faton Hajrizit tregon mungesën e bashkëpunimit juridik dhe politik mes Beogradit dhe Prishtinës

Eksperti i sigurisë, Nuredin Ibishi, vlerëson për Kosovo online se rasti i Faton Hajrizit tregon se përkundër marrëveshjeve të shumta mes Beogradit dhe Prishtinës, nuk ka bashkëpunim të mirë juridik dhe as politik.

Ibishi thekson se ka shumë deklarata të liderëve të Kosovës dhe Serbisë, përfaqësuesve, ministrave përkatës - kjo vlen për punët e brendshme, Ministrinë e Drejtësisë dhe punët e jashtme - në të cilat për mungesë bashkëpunimi jepen kualifikime të ndryshme.

Ai beson se ky rast është i politizuar, kështu që ndonjëherë cilësohet si vepër kriminale, ndërsa, siç thekson ai, Serbia pretendon se është akt terrorist.

“Rrjedhimisht, kjo është për shkak të mungesës së bashkëpunimit, sidomos të këtyre parimeve bazë të bashkëpunimit të fqinjësisë së mirë dhe luftës kundër krimit të organizuar”, thotë bashkëbiseduesi ynë.

Ai përkujton se mungesa e bashkëpunimit ka ekzistuar edhe në kohën e UNMIK-ut dhe se ky bashkëpunim ka qenë më shumë formal se sa real dhe praktik dhe se ka vazhduar edhe tani.

Një nga problemet është edhe në shkëmbimin e informacioneve për sigurinë e qytetarëve, por edhe në raste të veçanta siç është rasti i Faton Hajrizit.

Ibishi thotë se bashkëpunimi duhet të vendoset përmes marrëdhënieve të mira fqinjësore dhe në kuptimin funksional, jo vetëm për këtë rast, por për disa raste që mund të jenë të rëndësishme për sigurinë e qytetarëve si në Kosovë ashtu edhe në Serbi, sepse, shton ai “disa që kryejnë vepra kriminale në një shtet, gjetën strehim në një tjetër”.