Jevtiq: BKS për serbët në Kosovë është çështje jetike, një pjesë e opozitës në Beograd flet si Kurti

Kryetari i Komunës së Shtërpcës, Dallibor Jevtiq, tha se Bashkësia e Komunave Serbe është një çështje jetike për serbët në Kosovë, duke shtuar se një pjesë e opozitës në Beograd, në komentet e tyre kundër BKS-së, përmend të njëjtat argumente si kryeministri i Kosovës, Albin Kurti, transmeton RTV.

Jevtiq theksoi se Kurti po flet për faktin se Bashkësia e Komunave Serbe nuk ka kompetenca të veçanta, por se BKS është çështje jetike për serbët në Kosovë sepse, siç thotë ai, ai komunitet, sipas asaj që u ra dakord në Bruksel, do të ketë kompetenca që kanë të bëjnë me organizimin ekonomik dhe jetësor.

Ai saktësoi se BKS duhet të ketë një kryetar, një kuvend dhe se këto do të jenë organet që do të vendosin për jetën e serbëve në Kosovë.

“Kushdo që ka diçka kundër kësaj, ka diçka kundër jetës së serbëve në këto zona.

“Nuk mund të flitet ndryshe për Bashkësinë e Komunave Serbe vetëm sepse është një temë në të cilën do të sulmohet presidenti Aleksandar Vuçiq”, tha Jevtiq për Tanjug.

Përshtypja e tij, thotë ai, është se një pjesë e opozitës nuk po e sulmon marrëveshjen dhe dialogun, por presidentin e Serbisë, Aleksandar Vuçiq.

"Dhe ky është problemi më i madh që kemi sot”, tha Jevtiq dhe kujtoi skenat e pakëndshme në Kuvendin e Serbisë kur diskutohej për Kosovën, duke shtuar se i kanë dërguar botës një mesazh negativ.

Ai vlerëson se veprime të tilla të opozitës ndikojnë negativisht në pozitën e serbëve në Kosovë dhe jetën e tyre.
“Unë i kuptoj disa nevoja politike ditore të partive, por Kosova nuk është vendi ku duhet të udhëhiqen nga kjo”, ka theksuar Jevtiq.

Ai shtoi se duhet të merren vendime që do të ruajnë paqen dhe jetën e serbëve në Kosovë.

Jevtiq theksoi se BKS është e rëndësishme për serbët në Kosovë për shumë arsye.

“Imagjinoni sikur Prishtina me një vendim tjetër të njëanshëm të anulojë p.sh. transaksionet e pagesave, dhe është BKS që parashikon që financimi nga Serbia qendrore të kalojë përmes BKS-së, dhe kjo është me rëndësi jetike për ne, më lejoni të shtoj edhe kujdesin shëndetësor, potencialet ekonomike që nuk mund t'i shfrytëzojmë sot si qendra e skijimit në Brezovicë. E gjithë kjo është thelbësisht e rëndësishme”, tha Jevtiq.

Ai ka treguar edhe shembullin e komunës së Shtërpcës, e cila, siç tha, nuk ka marrë pëlqimin dhe licencën për të ofruar shërbime komunale në territorin e saj për më shumë se një vit.

"Dhe kjo është vetëm një dëshmi më shumë se sot Prishtina bën gjithçka, edhe në çështjet teknike, se serbët që jetojnë atje nuk kanë mundësi të drejtojnë siç duhet jetën e tyre," tha Jevtiq.