Jevtiq: Dhjetëra serbë, punonjës të Komunës së Shtërpcës, kanë marrë thirrje për t'u paraqitur në Policinë e Kosovës

Kryetari i Komunës së Shtërpcës, Dallibor Jevtiq, njoftoi se dhjetëra serbë, punonjës të Komunës së Shtërpcës, e cila funksionon në kuadër të sistemit të Republikës së Serbisë, kanë marrë thirrje për t'u paraqitur në Policinë e Kosovës, në departamentin për vepra të rënda penale në Prishtinë, në cilësinë e të dyshuarve, gjë që ai e përshkroi si një metodë të dhunës institucionale që regjimi në largim në Prishtinë po ushtron ndaj serbëve.

Ai ka shpjeguar në Facebook se bëhet fjalë për të ashtuquajturin cenim të rendit kushtetues të Kosovës.

“Me fjalë të tjera, ky është një proces tërësisht politik me qëllim të qartë dhe realizimin e politikës etnonacionaliste të Albin Kurtit, i cili nuk mund ta përballojë disfatën që pësoi në zgjedhje nga populli serb, i cili pavarësisht nga të gjitha presionet dhe represionet nga i njëjti Kurti, votoi për Listën Serbe”, ka shkruar ai.

Ai ka shtuar se nuk kanë asnjë pritshmëri nga Albin Kurti dhe se e kupton “nervozizmin” dhe veprimet e tij. Ai e shfrytëzoi këtë rast për t'u bërë thirrje edhe një herë përfaqësuesve të bashkësisë ndërkombëtare që të reagojnë dhe të ndalojnë këto veprime të dëmshme të regjimit në Prishtinë.

“I themi bashkëqytetarëve tanë të qëndrojnë të qetë, të dinë se nuk janë të vetëm në këtë luftë kundër represionit dhe dhunës institucionale që po kryen Kurti. Asnjë nga ata që po marrin thirrje për këtë çështje këto ditë nuk janë kriminelë, por janë njerëz të ndershëm që duan vetëm të jenë vetvetja dhe të bëjnë një jetë normale të denjë për një qenie njerëzore. Do të kalojë koha e politikës së dhunës dhe represionit të Albin Kurtit, do të vijë koha e paqes dhe e bashkëjetesës sepse drejtësia fiton gjithmonë në fund”, tha ai.