Jovanoviq: Loja e dyfishtë e Perëndimit, veprimet e dhunshme të Kurtit nuk do të ndalen

Ish-ministri i Punëve të Jashtme të RF të Jugosllavisë, Zhivadin Jovanoviq, thotë se përkundër mesazhit të Sekretarit të Përgjithshëm të NATO-s, Jens Stoltenberg se Policia e Kosovës para çdo aksioni në veri të Kosovës konsultohet me KFOR-in, kryeministri i Kosovës Albin Kurti nuk do të ndalë provokimet dhe veprime të dhunshme ndaj serbëve, transmeton Kurir.

“Për një periudhë të gjatë kohore, taktikat e qendrave perëndimore të pushtetit kanë marrë formë që struktura të caktuara të kritikojnë dhunën sistematike të institucioneve të përkohshme në Prishtinë kundër popullit serb, militarizimin e veriut, konfiskimin e pronës nga serbët dhe të ngjashme dhe të shpallen masa dhe të shpallen sanksione kundër Prishtinës, ndërsa, në të njëjtën kohë, një pjesë tjetër e po atyre qendrave të pushtetit perëndimor që janë në hije, në fakt mbulojnë dhe madje inkurajojnë sjelljen e dhunshme të Kurtit dhe strukturave të Prishtinës”, tha Jovanoviq.

Ai shtoi se aktualisht është në punë një taktikë e lojës së dyfishtë.

“Prandaj jam i bindur se qendrat amerikane, gjermane dhe britanike nuk do të mund ta frenojnë Kurtin dhe veprimet e tij të mëtejshme kundër serbëve dhe Serbisë”, ka thënë shprehimisht Jovanoviq.

Në të njëjtin mendim është edhe Predrag Rajiq nga Qendra për Stabilitet Social.

"Regjimi i Kurtit do të vazhdojë me provokime. Serbët në Kosovë dhe Metohi duhet të qëndrojnë të bashkuar dhe në marrëveshje me Beogradin. Situata është komplekse dhe padyshim do të mbetet e tillë edhe në periudhën e ardhshme", tha Rajiq.

Duke iu referuar deklaratës së Stoltenbergut, Suzana Grubjeshiq nga Qendra për Politikë të Jashtme tregon se është e qartë se pushteti aktual, në krye me Kurtin, as nuk i respekton dhe as nuk i njeh marrëveshjet e mëparshme me Beogradin dhe se qëllimi i vetëm është të frikësojnë serbët në veri dhe ruajnë paqëndrueshmëri të vazhdueshme.

“Hyrja e forcave speciale në fabrikën e zbrazët ‘Lola’, e cila nuk punon prej vitesh, vetëm një ditë pas deklaratës së Stoltenbergut është më shumë shprehje e pafuqisë së atij që urdhëron veprime të tilla të pakuptimta, sepse mbështetja për Prishtinën në qarqet ndërkombëtare zvogëlohet edhe më tej pikërisht për shkak të sjelljes joracionale dhe mosbashkëpunimit. Pres që KFOR-i të vazhdojë të përmbushë misionin e tij deri në deeskalim të plotë në veri, për të vazhduar dialogun dhe procesin e normalizimit të marrëdhënieve”, tha Grubjeshiq.