Kacarska: Me zgjedhjen e Kos, Ballkani Perëndimor nuk do të mbetet jashtë fokusit të BE

Drejtoresha e Institutit për Politikë Evropiane nga Shkupi, Simonida Kacarska, vlerësoi se në Komisionin Evropian ka pasur një luftë nëse komisioneri i ri për zgjerim do të fokusohet më shumë në Ukrainë apo në Ballkanin Perëndimor dhe se zgjedhja e Marta Kos është mesazh se rajoni nuk do të lihet jashtë fokusit të Bashkimit.

“Lufta në Komisionin Evropian ishte nëse komisioneri i ri i propozuar do të fokusohej më shumë në Ukrainë apo në Ballkanin Perëndimor. Me nominimin e sllovenes Marta Kos, kemi gjasa që Ballkani Perëndimor të mos mbetet jashtë fokusit, sepse sigurisht Ukraina ka rëndësinë më të madhe politike”, tha Katarska për Kosovo online.

Ajo shton se komisioneri evropian me shumë gjasa do të kërkojë “sjellje të ndryshme” nga vendet e rajonit kur bëhet fjalë për përmbushjen e detyrimeve të marra.

“Ne nuk jemi idealë”, thekson Kacarska.

Ajo thekson se vendet e Ballkanit Perëndimor do të presin shumë më tepër mirëkuptim për disa çështje bilaterale.

“Ata ndoshta do ta marrin këtë, por nuk mund të pres që të kenë më shumë ndikim se Ukraina dhe Moldavia, të cilat janë interesi parësor i Unionit në periudhën e ardhshme”, thekson Katarska.

Ajo vlerëson se është një lajm i mirë për rajonin që në krye të portofolit për zgjerimin e BE-së do të jetë dikush nga fqinjët, por praktika aktuale tregon se zgjerimi vendoset nga vende shumë më të mëdha dhe më të rëndësishme.

“Lajmi i mirë për ne është se ajo e njeh rajonin. Ndoshta lajmi më i mirë do të ishte se vjen nga një vend më i madh dhe më i rëndësishëm. Shumë prej nesh që punojnë në këtë temë thonë se zgjerimi më i suksesshëm i BE-së ndodhi kur komisioneri i zgjerimit ishte gjerman. Prandaj, nga ky aspekt, Sllovenia nuk e ka peshën që do ta kishin vendet më të mëdha, por nga ana tjetër ajo njehë më mirë rajonin. Rreptësia, nëse ka, nuk duhet parë si mangësi, përkundrazi, ndoshta do të ishte më mirë që shumë nga këto vende të vlerësoheshin sipas standardeve më të larta”, përfundon Kacarska.