Kurti me Sholle për dialogun dhe situatën në katër komunat e veriut pas zgjedhjeve

Kryeministri Albin Kurti mbrëmë ka biseduar në telefon me këshilltarin e lartë të Departamentit Amerikan të Shtetit, Derek Sholle, për procesin e dialogut ndërmjet Kosovës dhe Serbisë, si dhe situatën në katër komuna në veri të Kosovës pas zgjedhjeve të mbajtura më 23 prill, njofton Klan Kosova.

“Ata diskutuan për procesin e dialogut ndërmjet Kosovës dhe Serbisë, me theks në zbatimin e plotë dhe të pakushtëzuar të Marrëveshjes Themelore, si dhe takimin që u mbajt të hënën në Bruksel në nivel të negociatorëve kryesorë. U fol edhe për situatën në katër komuna në veri të Kosovës pas zgjedhjeve të 23 prillit dhe finalizimit të procesit zgjedhor lidhur me mbajtjen e seancave konstituive dhe betimin e kryetarëve të zgjedhur të komunave”, thuhet në njoftim.

Bashkëbiseduesit iu referuan edhe vizitës në Kosovë të administratores së USAID-it, Samanta Pauer, e cila së bashku me Kurtin dhe ministren Rizvanolli shpallën ankandin e parë për parkun me energji solare me kapacitet prej 100 MW.