Lista Serbe: Me hyrjen në objektin e Kryqit të Kuq rrezikohet mandati i njërës nga organizatat më të rëndësishme humanitare në botë

Lista Serbe, me rastin e hyrjes së Policisë së Kosovës në hapësirat e Kryqit të Kuq të Kosovës dhe Metohisë, ka deklaruar se Kryqi i Kuq është një organizatë humanitare mbinacionale dhe neutrale që vepron në përputhje me të drejtën ndërkombëtare dhe Konventat e Gjenevës, dhe se me këtë veprim është rrezikuar puna dhe mandati i njërës prej organizatave më të vjetra dhe më të rëndësishme humanitare në botë.

Siç thekson Lista Serbe, hyrja e Policisë së Kosovës përbën një shkelje të rëndë të të gjitha konventave relevante ndërkombëtare.

“E rikujtojmë opinionin publik se Kryqi i Kuq është një organizatë humanitare mbinacionale dhe neutrale, e cila vepron në përputhje me të drejtën ndërkombëtare dhe Konventat e Gjenevës, të cilat i obligojnë të gjitha palët që të respektojnë statusin, paanshmërinë dhe misionin e saj. Sulmi ndaj objektit të kësaj institucioni përbën shkelje të rëndë të të gjitha konventave relevante ndërkombëtare, përfshirë Konventën e Katërt të Gjenevës për mbrojtjen e personave civilë në kohë lufte (1949), Protokollet e vitit 1977 dhe 2005 të bashkangjitura Konventave të Gjenevës, Statutin e Lëvizjes Ndërkombëtare të Kryqit të Kuq dhe Gjysmëhënës së Kuqe, si dhe parimet themelore humanitare: neutralitetin, pavarësinë dhe humanizmin”, thuhet në reagimin e Listës Serbe.

Siç theksojnë ata, Kryqi i Kuq i Kosovës dhe Metohisë është një organizatë ligjore e njohur si pjesë e plotë e Komitetit Ndërkombëtar të Kryqit të Kuq, i cili gjatë viteve të aktivitetit të tij mblodhi të gjitha komunitetet dhe me vetëmohim u ofroi ndihmë anëtarëve të të gjitha komuniteteve - serbe, shqiptare, rome, boshnjake dhe të tjera.

"Puna e tyre është simbol i humanizmit, solidaritetit dhe bashkëpunimit, pikërisht në mjedisin ku është më i nevojshëm. Përveç kësaj, kjo organizatë punon në mënyrë aktive në edukimin dhe aftësimin e të rinjve, në radhë të parë përmes programeve që ofrojnë ndihmën e parë dhe përgatitjen për t'iu përgjigjur në rast të fatkeqësive natyrore, e cila kontribuon drejtpërdrejt në ndërtimin e një shoqërie më të sigurt dhe më humane. Veçanërisht shqetësues është fakti se veprime të tilla kërcënojnë drejtpërdrejt funksionimin e sistemit të dhurimit vullnetar të gjakut, i cili prej shumë vitesh organizohet nga Kryqi i Kuq i Kosovës dhe Metohisë. Falë punës së tij, me gjak furnizohet institucionet shëndetësore në Mitrovicë, Graçanicë dhe Pasjan. Sulmi ndaj këtij institucioni vë në pikëpyetje stabilitetin e sistemit të kujdesit shëndetësor dhe sigurinë e pacientëve që varen nga furnizimet e rregullta me gjak”, thuhet në njoftim.

Ata shtojnë se për shkak të kësaj, si dhe veprimeve të shumta të mëparshme unilaterale dhe të dhunshme nga institucionet e Kosovës, Lista Serbe do të kërkojë një takim urgjent me ambasadat e vendeve të Quint-it në Mitrovicën e Veriut, me qëllim që të theksohet drejtpërdrejt kërcënimi ndaj të drejtave themelore të popullit serb, sigurisë në terren dhe funksionimit të shërbimeve humanitare dhe shëndetësore.

“Ne i bëjmë thirrje bashkësisë ndërkombëtare, përfshirë përfaqësuesit e OKB-së, BE-së dhe OEBS-së, që të reagojnë pa vonesë, ta dënojnë këtë akt dhe të ndërmarrin hapa konkretë në përputhje me mandatet e tyre. Lista Serbe, si më parë, do të vazhdojë të jetë me popullin e saj dhe me të gjithë punonjësit humanitarë, duke ruajtur dinjitetin dhe të drejtën ndërkombëtare, pavarësisht provokimeve dhe dhunës së regjimit në largim të Kurtit”, përfundojnë nga Lista Serbe.