Lista Serbe: Që kur Kurti erdhi në pushtet, nuk ka pasur ditë pa sulm me motive etnike ndaj serbëve

Në terren, dhuna dhe terrori institucional ushtrohet çdo ditë ndaj serbëve të mbetur, ndërsa në anën tjetër Kosova shpallet demokratike dhe po shtyhet me çdo mënyrë në Këshillin e Evropës, ka bërë të ditur Lista Serbe pasi një grup shqiptarësh rrahën dhe grabitën një të ri 20-vjeçar, Petar Kostiq, në Mitrovicën e Veriut.

Lista Serbe tregon se që nga ardhja në pushtet e kryeministrit të Kosovës, Albin Kurti, nuk ka pasur ditë pa sulm të motivuar etnik ndaj serbëve.

“Përderisa kjo lloj Kosove, me këtë lloj regjimi, shpallet demokratike dhe shtyhet në Këshillin e Evropës në çdo mënyrë, dhuna dhe terrori institucional ushtrohet në terren ndaj serbëve të mbetur. Kështu serbët, pronat e tyre dhe të Kishës Ortodokse Serbe sulmohen çdo ditë. Që nga ardhja në pushtet e regjimit të Albin Kurtit, nuk ka pasur ditë pa sulm të motivuar etnik ndaj serbëve”, njoftojnë nga Lista Serbe.

Sipas tyre, Kostiq ka arritur të marrë vetëm lëndime të lehta fizike për fat të plotë, por që ngjarja do të lërë pasoja për të.

Ky sulm, siç theksojnë ata, është sulmi i 500-të i motivuar etnik që kur Kurti erdhi në pushtet dhe është “pamja dhe mundësia më e mirë e qëndrimit të tij ndaj serbëve dhe gjithçkaje serbe”.

“Ne i bëjmë thirrje EULEX-it që të përfshihet drejtpërdrejt në këtë rast përmes punonjësve të tyre dhe të paraqesë një raport para publikut sa më shpejt që të jetë e mundur, pasi që populli serb nuk ka besim në njësitë policore të Kurtit të cilat janë të pranishme në terren dhe të cilat nuk kanë ndriçuar asnjë krim ndaj serbëve dhe pjesëtarët e të cilëve në disa raste kanë ushtruar drejtpërdrejt dhunë ndaj serbëve”, thuhet në Listën Serbe.