Lluçiq: Kurti ta lëre rehat Telekomin, pres mbështetje nga SHBA dhe BE

Drejtori i Telekom Serbia, Vlladimir Lluçiq, i cili po qëndron për vizitë në Uashington, tha se Telekomi do të mbrohet fuqishëm në Kosovë dhe se pret që SHBA dhe BE t'ia bëjnë të qartë administratës së Kurtit që ta lënë rehat Telekomin.

Lluçiq është optimist, përkundër presionit të vazhdueshëm ndaj Telekomit në Kosovë, dhe beson se ata do të dalin fitimtarë nga kjo betejë. Ai theksoi se kanë pritur me një pritje fenomenale në Uashington, por edhe në BE.

“Mënyra se si na mirëpresin në Bruksel, si dhe mbështetja e institucioneve më të rëndësishme financiare në SHBA dhe BE, janë shembulli më i mirë i fuqisë së madhe të Telekom Serbia dhe reputacionit ndërkombëtar të kompanisë”, tha Lluçiq.

Kreu i kompanisë më të suksesshme serbe ditët e fundit i ka kaluar në kryeqytetin amerikan, ku ka pasur një sërë takimesh të rëndësishme. Një nga temat ishin pikërisht problemet që administrata e Albin Kurtit po i krijon Telekomit në Kosovë.

“Ne do të mbrohemi fuqishëm, nuk do të lejoj askënd që të na keqtrajtojë dhe pikërisht kështu mund të përshkruhet më së miri sjellja e Prishtinës ndaj degës sonë të MTS në Kosovë. Vitin e kaluar, administrata e Kurtit dështoi në përpjekjen e saj për të na ndaluar të punojmë në KeM, kështu që tani duan të na vjedhin paratë, të ndalojnë zgjerimin e MTS, të pushtojnë lokalet tona me armë tytëgjata dhe të frikësojnë punonjësit. Pres që SHBA dhe BE t'ia bëjnë të qartë administratës së Kurtit që ta lërë rehat Telekomin. Pas kësaj vizite në Uashington jam edhe më optimist se nga kjo betejë do të dalim fitues, do të tregojmë se jemi një kompani që di të mbrojë interesat e saj kur kërcënohen”, tha Vlladimir Lluçiq.

Ai tha se këtë muaj do të ketë një sërë aktivitetesh lidhur me sulmet e Kurtit ndaj MTS, duke përfshirë vizitën në Prishtinë dhe bisedimet me diplomatët perëndimorë. Pritet një reagim pozitiv edhe nga BE.

“Kur administrata e Kurtit u përpoq të na mbyllte verën e kaluar, përfaqësuesi special i BE Mirosllav Lajçak dhe ekipi i tij reaguan në mënyrë të shkëlqyeshme, për të cilën jam jashtëzakonisht mirënjohës. Jam i bindur që kështu do të jetë edhe tani. Sjellja skandaloze e Agjencisë së Prishtinës për Mbrojtjen e Konkurrencës dhe drejtorit të saj nuk është parë në praktikën evropiane. Prishtina duke ngacmuar Telekomin po shkel në mënyrë drastike Marrëveshjen e Brukselit madje edhe ligjet e veta, duke tentuar t'i zbatojë ato në mënyrë retroaktive, po cenohet liria e konkurrencës dhe jeta e serbëve në Kosovë e Metohi bëhet edhe më e vështirë. Ajo që edhe Prishtina nuk ka përgjigje dhe që është një argument që SHBA dhe BE e kuptojnë shumë mirë, është se si MTS në Kosovë dhe Metohi nuk ka pasur ndonjë problem të madh, kemi punuar normalisht deri në ardhjen e Kurtit në pushtet”, ka thënë Lluçiq.

Krahas gjithë sa më sipër, kreu i Telekomit vuri në dukje faktin se kompania serbe operon pa problem në të gjithë Ballkanin Perëndimor, përfshirë Kroacinë dhe Bosnje-Hercegovinën, dhe probleme ka vetëm në Kosovë, për shkak të “sjelljes së paarsyeshme të administratës së Kurtit”.

Gjatë vizitës së tij në Uashington, Lluçiq pati bisedime shumë të rëndësishme në Departamentin e Shtetit dhe bankën shtetërore të eksport-importit Eksim. Lluçiq shpjegoi se Telekom dhe Eksim Bank po negociojnë një partneritet kushtuar projekteve më të rëndësishme të kompanisë, ndër të cilat janë zgjerimi i saj ndërkombëtar dhe zhvillimi i rrjetit 5G.

“Ne do të ishim vetëm kompania e dytë në botë që kemi një bashkëpunim të tillë me Eksim Bank, e cila është agjencia zyrtare shtetërore e eksport-importit të SHBA. Do të ishte një tjetër konfirmim i fuqisë së Telekomit, i cili tashmë është dëshmuar nga partneriteti me Bankën Evropiane të Investimeve, Bankën Evropiane për Rindërtim dhe Zhvillim dhe Bankën Botërore. Të gjithë ata besojnë në planin tonë të biznesit dhe besojnë se ne kontribuojmë pozitivisht në zhvillimin e të gjithë shoqërisë”, tha Lluçiq.

Drejtori i përgjithshëm i Telekomit i njoftoi bashkëbiseduesit në Uashington me planin që operatori serb të fillojë të operojë në SHBA këtë vit, gjë që pati reagime mjaft pozitive. Target grupi i Telekomit në Amerikë do të jetë kryesisht diaspora nga rajoni ynë. Ambiciet me projektin për diasporën janë të larta, do të përfshijë territore me mbi 500 milionë banorë, me një potencial të madh për rritjen e numrit të përdoruesve, të ardhurave dhe fitimeve.

Ai theksoi se viti paraprak ishte një vit rekord për biznesin e Telekom Serbia.

“Për herë të parë në historinë e Telekomit do të jemi afër 1.5 miliardë euro të hyra, dhe kjo është vetëm në territorin e Serbisë. Gjithashtu kemi bërë një fitim neto rekord prej 300 milionë euro dhe e mbyllëm vitin e kaluar me mbi 130 milionë euro. në llogarinë tonë - tha Lluçiq.