Mitiq: Kfor dhe Nato marrin anësi duke lënë Prishtinën të bëjë ç'të dojë

Bashkëpunëtori hulumtues në Institutin për Politikë dhe Ekonomi Ndërkombëtare, Aleksandar Mitiq, ka vlerësuar për Kosovo online se KFOR-i dhe NATO po e “marrin anësi” duke lënë Prishtinën dhe kryeministrin e Kosovës Albin Kurti të bëjnë çfarë të duan, dhe theksoi se serbët duhet të jenë të gatshëm për një sërë veprimesh të rrezikshme që autoritetet e Kosovës mund t'i zbatojnë në ditët në vijim.

Sipas Mitiqit, humbësit më të mëdhenj të asaj që ndodhi në Banjskë gjatë natës së së shtunës dhe të dielës janë familjet e viktimave, por edhe të gjithë serbët dhe shqiptarët.

“Beogradi është gjithashtu humbës, sepse para disa ditësh në seancën e Asamblesë së Përgjithshme të OKB-së, presidenti i Serbisë, Aleksandar Vuçiq, në mënyrë elokuente theksoi standardet e dyfishta në lidhje me respektimin e integritetit territorial dhe pse Serbia nuk mund të heqë dorë nga Kosova dhe Metohija, që kërkohet prej saj”, tha Mitiq.

Ai thekson se presionet ndaj Serbisë ushtrohen pikërisht nga krizat e tilla të përshkallëzuara që Kurti, Prishtina dhe Quint-i i kanë bërë prej kohësh.

“Mund të themi se humbës edhe më të mëdhenj se Beogradi janë serbët e Kosovës që jetojnë dhe do të jetojnë në një atmosferë frike, dhe aktualisht po përjetojnë tmerr të vërtetë. Gjithçka që dëgjojmë përmes mediave, nga miqtë dhe të njohurit, gjithçka që po ndodh në këtë moment atje poshtë dhe që do të ndodhë në orët dhe ditët në vijim është tmerruese dhe flet për faktin se objektivi kryesor i atij terrori janë serbët në Kosova dhe Metohia”, ka thënë Mitiq.

Ai vlerëson se mbetet të shihet se kush do të jetë fituesi.

“Në pamje të parë duket se janë Kurti dhe Quint-i, secili për arsyet e veta dhe kanë interesa të përbashkëta. Kurti, sepse me përshkallëzim arriti të legjitimojë me forcë atë që ka bërë prej një viti, që është ai që kontrollon situatën në veri të Kosovës, përkundër shkeljes së të gjitha marrëveshjeve të mundshme që Beogradi kishte me KFOR-in dhe NATO. E shohim se Kfori e ka lënë Prishtinën të bëjë çfarë të dojë, jo vetëm dje, por edhe në periudhën e kaluar”, ka thënë Mitiq.

Ai ka shtuar se Kurti po legjitimohet si faktor që kontrollon sigurinë në veri.

"Ai ka punuar për këtë me anëtarë individualë të Quint-it gjatë vitit të kaluar. Kishte dallime taktike brenda Quinti-it, disa ishin për moslejimin e dhunës ndaj tij, disa ishin për një qëndrim më të ashpër dhe padyshim që linja më e ashpër mbizotëroi në fund”, tha Mitiq.

Ai shton se është e qartë se NATO dhe KFOR nuk po reagojnë sepse ekziston një politikë e “marrjes së anësisë”.

“Është e qartë se ekziston kjo e ashtuquajtura politikë ‘carte blanche’ ose ‘lese fair’, është një politikë ku NATO marr anësi, nuk po bën punën e vet dhe po i lë shqiptarët të legjitimojnë atë që ata e konsiderojnë integritetin territorial dhe sovranitetin e Prishtinës mbi të gjithë territorin e Kosovës dhe Metohisë, duke përfshirë edhe veriun, i cili ka pasur një problem të madh që nga përfundimi i agresionit të NATO-s, përshkallëzimi i dhunës. Ajo që është më e qartë është se EULEX-i nuk e di se çfarë po bën në Kosovë. Anëtarët e tyre me siguri janë duke pirë kafe në Prishtinë derisa e gjithë kjo po ndodh dhe Kfor-i po marr anësi, dhe shqiptarët me formacione të ndryshme, kryesisht ilegale dhe jolegjitime – duke qenë se shumë prej tyre veprojnë jashtë Rezolutës 1244 të Këshillit të Sigurimit të OKB-së – veprojnë si të duan”, thotë Mitiq.

Ai shton se qëllimi kryesor i gjithë historisë është që Serbia të harrojë se cilat janë interesat e saj.

“Të harrojë se cili ishte qëndrimi i Beogradit dhe serbëve të Kosovës kur u larguan nga institucionet gati një vit më parë, kur ata kundërshtuan dhunën e Prishtinës dhe Kurtit dhe mosveprimin dhe presionin e pamjaftueshëm nga Perëndimi ndaj tij për të përmbushur atë që ishte rënë dakord në Marrëveshjet e Brukselit, çfarëdo qofshin ato. Dhe për mendimin tim, ata nuk janë të mirë për interesat serbe, gjë që mund të shihet nga ajo që ndodhi dje, kur serbët u lanë disi të luftojnë vetëm, duarzbathur, në kuptimin që ata nuk kanë mbështetjen që mund të vinte nga Beogradi”, thotë Mitiq.

Ai shton se përmes "presionit ndaj serbëve të Kosovës, Beogradi detyrohet t'i kthehet dialogut dhe të zbatojë planin dhe marrëveshjen e keqe franko-gjermane nga Ohri".

"Dhe nga ana tjetër, nuk ka asnjë garanci se do të përmbushen kërkesat serbe dhe do të themelohet Bashkësia e Komunave Serbe dhe se dhuna e Kurtit do të ndalet. Kjo është një lloj shkurtore që do të përdoret për të bërë presion mbi Beogradin. Nëse Beogradi, pas asaj që ndodhi dje, pranon të marrë pjesë në dialog sipas planeve, skemave që ndoshta po negociohen në Bruksel për momentin në takimin mes Lajçakut, Eskobarit dhe anëtarëve të Quint-it, atëherë do të jetë keq për Beogradin. Dhe kjo nuk do të përmirësojë pozitën e Beogradit apo serbëve të Kosovës”, beson Mitiq.

​Ai shton se ekziston frika e presioneve të reja ndaj serbëve në veri.

“Ne shohim se nuk mund ta imagjinojmë më se nga do të vijë presioni i radhës, ka një sërë metodash të ndryshme që përdoren për të diskriminuar serbët, nëse është ngacmim, arrestime për krime lufte, ndalim i importit të barnave dhe ushqimeve, dhunë, hedhje bombash. Ajo atmosferë frike dhe dhune që u krijua dhe po krijohet, i përgjigjet Prishtinës dhe atyre që qëndrojnë pas saj brenda Quint-it. Kjo do të thotë se serbët në Kosovë duhet të përgatiten për një sërë veprimesh të rrezikshme të Prishtinës, të cilat fatkeqësisht mund të sjellin sërish viktima”, ka theksuar Mitiq.