Nastiq: Para 26 vitesh, duke përdorur gënjeshtrën për "Aushvicin në Kosovë", u shkel e drejta ndërkombëtare

Para 26 vitesh, duke përdorur gënjeshtrën për "Aushvicin në Kosovë", Gjermania mori pjesë në luftën e NATO-s në Kosovë dhe kështu shkeli të drejtën ndërkombëtare dhe të drejtat e njeriut, thekson politikania gjermane Zhaklin Nastiq.

"Para 26 vitesh, qeveria e atëhershme gjermane 'kuqe-gjelbër' mori pjesë në luftën kundër RFJ-së, duke shkelur të drejtën ndërkombëtare. E drejta ndërkombëtare dhe të drejtat e njeriut u hodhën në 'plehërishtën e historisë' – Karta e OKB-së u shkel përmes instrumentalizimit më të keq të kapitullit më të errët të historisë gjermane. Ministri i Jashtëm i Gjelbër, Joshka Fisher, gënjeu për Aushvicin në Kosovë për t’ia shitur luftën publikut si një 'ndërhyrje humanitare'", theksoi Nastiq në një postim në rrjetin "X".

Ajo shtoi se falë gënjeshtrave të Fisherit dhe ministrit socialdemokrat të Mbrojtjes Rudolf Sharping, Gjermania mori pjesë në luftën e Kosovës me NATO-n, për herë të parë që nga Lufta e Dytë Botërore.

"Sa turp që njerëzit në Jugosllavi duhej të kërkonin strehim nga bombat gjermane në strehimore gjatë sulmeve ajrore, siç bënin dikur prindërit, gjyshërit e tyre për shkak të nazistëve," nënvizoi ajo.

Nastiq theksoi se 24 marsi 1999 shënoi fillimin e epokës së ndryshimit të dhunshëm të regjimit dhe ndërhyrjes humanitare të politikës së jashtme të të Gjelbërve.

“Siç ndodhi më vonë në Afganistan, Libi, Siri dhe Venezuelë, nuk bëhej fjalë për demokracinë dhe të drejtat e njeriut, por për avancimin e interesave të veta gjeopolitike dhe dobësimin e Rusisë. Pa një mandat të Këshillit të Sigurimit të OKB-së, ata shkelën ligjin ndërkombëtar dhe shkatërruan qëllimisht infrastrukturën - ura, shkolla, spitale, energji elektrike dhe furnizime me ujë. NATO përdori mbi 30 mijë bomba uraniumi dhe bombardoi qendrat kimike në Pançevë, Novi Sad dhe Bor”, theksoi Nastiq, duke shtuar se kjo luftë kriminale zgjati 78 ditë e net.

Deri në ditët e sotme, thekson ajo, “kriminelët-burokratë” kanë mbetur të pandëshkuar për vrasjet dhe shkatërrimin.

"Në vend të kësaj, ata deri më sot vazhdojnë ta shesin shkëputjen e paligjshme të Kosovës dhe Metohisë nga Serbia dhe shkeljen e vazhdueshme të së drejtës ndërkombëtare si legjitime. Deri më sot, heshtet se kush i ka financuar, armatosur dhe trajnuar të ashtuquajturit 'luftëtarë të lirisë' të UÇK-së. Ata po ashtu heshtin për spastrimet etnike në Kosovë ndaj serbëve dhe pakicave të tjera nga 'qeveria' nacionaliste e djathtë në Prishtinë. Kushdo që mbron këto të ashtuquajtura 'vlera', justifikon dhe legjitimon luftërat dhe shkeljet e së drejtës ndërkombëtare, si dhe lejon që autorët të mbeten të pandëshkuar, është bashkëpunëtor në krimin që u krye atëherë," tha Nastiq.

Ajo theksoi se kjo vlen veçanërisht në kohët kur ata që e quajnë veten "mbrojtës të vlerave" në Ukrainë flasin për të drejtën ndërkombëtare, por e respektojnë atë vetëm aty ku u përshtatet qeverisë dhe sistemit të tyre politik.

"Ne u detyrohemi viktimave që të mos heshtim për këtë luftë," përfundoi Nastiq.