NATO: Vazhdojmë të mbështesim dialogun ndërmjet Beogradit dhe Prishtinës, jemi plotësisht të përkushtuar ndaj sigurisë në Kosovë

NATO vazhdon të mbështesë dialogun ndërmjet Beogradit dhe Prishtinës të ndërmjetësuar nga Bashkimi Evropian dhe u bën thirrje të dyja palëve që të angazhohen në zgjidhjen e çështjeve të mbetura dhe arritjen e një zgjidhjeje që respekton të drejtat e të gjitha komuniteteve, pasi kjo është me rëndësi kyçe për sigurinë afatgjatë në Kosovë dhe stabilitetin e rajonit, thuhet në deklaratën e NATO-s me rastin e 27-vjetorit të hyrjes së forcave të Aleancës në Kosovë.

Në deklaratë thuhet se situata e sigurisë në Kosovë ka vazhduar të përmirësohet gjatë viteve të fundit.

“Në përputhje me këtë, në janar NATO pezulloi dislokimin e forcave rezervë në kuadër të misionit të KFOR-it, pas më shumë se dy vjetësh rotacioni të vazhdueshëm. Meqenëse situata e sigurisë në Kosovë në përgjithësi mbetet stabile, NATO do të optimizojë vendosjen e KFOR-it në Kosovë dhe do të përshtatë gradualisht numrin aktual të trupave gjatë vitit të ardhshëm”, thuhet në deklaratë.

Kujtohet se që nga viti 1999, vendosja e KFOR-it është përshtatur vazhdimisht për të siguruar që misioni të mbetet efektiv dhe t’u përgjigjet ndryshimeve në situatën e sigurisë.

“Pas tensioneve të shtuara dhe dhunës në vitin 2023, përfshirë sulmet e pajustifikuara ndaj pjesëtarëve të KFOR-it në Zveçan, KFOR-i mori përforcimin më të madh në më shumë se një dekadë, me dislokimin e afro 1.000 ushtarëve shtesë”, shtohet në deklaratë.

Po ashtu theksohet se, duke qenë se situata e sigurisë tani është stabile, vendosja e forcave të KFOR-it mund të përshtatet me rrethanat e reja, duke ruajtur në mënyrë efektive një mjedis të sigurt për të gjithë njerëzit dhe komunitetet që jetojnë në Kosovë, si dhe lirinë e lëvizjes, në çdo kohë dhe në mënyrë të paanshme, në përputhje me mandatin e tij afatgjatë të Kombeve të Bashkuara, të bazuar në Rezolutën 1244 të Këshillit të Sigurimit të OKB-së nga viti 1999, dhe në koordinim të ngushtë me Policinë e Kosovës dhe Misionin e Bashkimit Evropian për Sundimin e Ligjit në Kosovë (EULEX), në rolet e tyre si institucione përgjegjëse për sigurinë.

“NATO dhe KFOR-i janë plotësisht të përkushtuar ndaj sigurisë në Kosovë. Pikërisht ky përkushtim ka kontribuar në rritjen e stabilitetit, pasi institucionet e sigurisë në Kosovë janë bërë më të afta. Kushtet aktuale ofrojnë mundësi për optimizimin e mëtejshëm të madhësisë dhe vendosjes së forcave të KFOR-it”, ka deklaruar së fundmi Komandanti Suprem i Forcave Aleate për Evropën, gjenerali i Forcave Ajrore të SHBA-së, Aleksus Grinkeviç, kujtohet në deklaratë.

Gjenerali Grinkeviç gjithashtu ritheksoi përkushtimin e fortë të NATO-s ndaj Ballkanit Perëndimor, një rajon me rëndësi strategjike për Aleancën, siguria e të cilit është e lidhur drejtpërdrejt me sigurinë e hapësirës euroatlantike, duke shtuar se NATO nuk do të lejojë krijimin e një vakumi të sigurisë.

“Optimizimi, i shpallur me rastin e 27-vjetorit të misionit, po zbatohet në kuadër të autorizimeve ekzistuese të Komandantit Suprem të Forcave Aleate për Evropën dhe pasoi një vlerësim të thelluar të situatës së sigurisë të bazuar në të dhëna të inteligjencës. Pritet që reduktimi gradual i forcave të ndjekë ciklet kombëtare të rotacionit dhe rishpërndarjes nga tani deri vitin e ardhshëm. Optimizimi do të zbatohet gradualisht dhe në përputhje me situatën në terren, ndërsa mund të pezullohet nëse këtë e kërkojnë rrethanat përkatëse të sigurisë”, shtohet në deklaratën e NATO-s.