Petkoviq: Kurti paralajmëroi formimin e Xhandarmërisë për qëllime të fushatës parazgjedhore, KFOR-i është forca e vetme legjitime e armatosur në Kosovë

Drejtori i Zyrës për KeM, Petar Petkoviq, deklaroi se planet për formimin e Xhandarmërisë së Kosovës janë paralajmëruar në funksion të fushatës parazgjedhore të Albin Kurtit, duke theksuar se KFOR-i mbetet forca e vetme legjitime e armatosur në Kosovë.

“Fantazitë parazgjedhore dhe lëvizjet e dëshpëruara të Albin Kurtit, i cili paralajmëron formimin e një njësie të ashtuquajtur të Xhandarmërisë, janë të destinuara për fitimin e pikëve të lira politike, sepse fushata e tij dukshëm nuk po shkon ashtu siç e kishte planifikuar. Nuk ekziston as bazë dhe as hapësirë që Kurti të formojë njësi paramilitare dhe parapolicore jashtë marrëveshjeve ekzistuese, e aq më pak t’i vendosë ato në zonat serbe në veri të KeM”, thuhet në deklaratën e drejtorit të Zyrës për KeM.

Petkoviq më tej thekson se KFOR-i është e vetmja forcë legale dhe legjitime e armatosur në Kosovë, “e ngarkuar edhe për kontrollin dhe patrullimin përgjatë vijës administrative, dhe këtë Kurti e di shumë mirë, ndërsa realitetin nuk mund ta ndryshojë me fotografime dhe premtime në fushatën parazgjedhore”.

“Gjithashtu, neni 9 i Marrëveshjes së Brukselit thotë se përbërja e të ashtuquajturës polici e Kosovës në veri duhet të pasqyrojë përbërjen etnike të popullsisë së këtyre katër komunave, ndërsa Plani i Zbatimit përcakton qartë se asnjë formacion i ri policor në veri nuk mund të formohet pa pëlqimin e Grupit Punues, ku përveç Prishtinës bëjnë pjesë edhe përfaqësues të Beogradit dhe të Bashkimit Evropian, dhe pa lejen e tyre një gjë e tillë nuk është e mundur. Prandaj aktivitetet e fundit parazgjedhore të Albin Kurtit nuk janë asgjë më shumë se një mashtrim i pastër, siç do të thoshte populli ynë”, përfundon Petkoviq.

Lideri i Vetëvendosjes, Albin Kurti, dhe kryeministri i Kosovës në mandat teknik, paralajmëroi se në mandatin e ardhshëm synon të formojë Xhandarmërinë.

“Do ta formojmë Xhandarmërinë në mandatin e ardhshëm. Xhandarmëria do të merret kryesisht me luftën kundër krimit dhe korrupsionit në zonat kufitare. Do të luftojë kundër terrorizmit... Xhandarmëria është diçka mes policisë dhe ushtrisë. E dini, Italia ka karabinierët, ndërsa Franca ka xhandarmërinë. Ne do ta kemi Xhandarmërinë tonë në Republikën e Kosovës”, tha Kurti.