Nisma e re shoqërore: Niveli aktual i mosbesimit mes qytetarëve dhe policisë është i paqëndrueshëm

Organizata joqeveritare Nisma e re shoqërore njoftoi se dënon arrestimin e drejtoreshës së saj, Jovana Radosavleviq, edhe pse nuk e konsideron të papritur arrestimin, duke pasur parasysh atmosferën që mbizotëron në veri të Kosovës, ku qytetarët, siç thonë ata, gjithnjë e më shumë kanë frikë se mos ndalohen pa arsye, sepse niveli aktual i mosbesimit mes qytetarëve dhe policisë është i paqëndrueshëm dhe kërkon masa urgjente për uljen e tensioneve.

Nga kjo organizatë kanë kujtuar në Facebook se Jovana Radosavleviq është ndaluar dje në postbllokun e Bistricës për kinse filmime të paautorizuara. Pas marrjes në pyetje në stacionin policor në Zveçan, ajo është liruar me njoftim se ka kryer kundërvajtje.

Ata theksuan se Radosavleviq filmoi nga makina duke përdorur një telefon të vendosur në një mbajtëse të siguruar për atë qëllim. Ata shtuan se kjo metodë regjistrimi ishte ekuivalente me përdorimin e një kamere në pultin e makinës dhe, si në rastin e një kamere të tillë, ishte vetëm për sigurinë dhe mbrojtjen e saj personale.

“Besimi i qytetarëve në veri të Kosovës në Policinë e Kosovës, dhe veçanërisht në njësitë speciale të dislokuara në postbllokun e Bistricës, është në nivel rekord të ulët. Për këtë kontribuon edhe sjellja e policëve në atë pikë. Radosavleviq, familja e të cilit jeton në Leposaviq, kalon nëpër postbllokun e Bistricës disa herë në javë dhe tashmë ka përjetuar një sërë situatash të pakëndshme: nga vënia e armëve në drejtim të saj gjatë kontrolleve, përmes komenteve të papërshtatshme për statusin e saj martesor, deri në situata ku komunikimi me punonjësit e policisë ishte praktikisht i pamundur”, deklaruan ata.

Për shkak të përvojave të saj personale, shtohet, por edhe dëshmive të qytetarëve të tjerë për incidente, përfshirë plagosjen e një qytetari nga policia në të njëjtën pikë, e rrethuar me “fole snajperash”, Radosavleviq ka ndjerë nevojën që të mbrohej edhe më shumë nga sjellje potencialisht joprofesionale dhe madje brutalitet të mundshëm policor. Ajo e pa filmimin si një mënyrë për të siguruar prova në rast telashe.

“Lind pyetja, mbi çfarë baze dhe me çfarë motivesh u vendos ndalimi i xhirimeve në pjesën e rrugës kryesore, që është zonë publike? A ky vendim i policisë ka për qëllim parandalimin e dokumentimit të sjelljes së tyre joprofesionale, posaçërisht duke pasur parasysh se është miratuar pas incidenteve në atë vend që shkaktuan vëmendje të madhe publike?”, pyeti OJQ.

Ata besojnë se joprofesionalizmi i policisë është demonstruar edhe dje, kur policia ka tentuar t'ia marrë telefonin Radosavleviqit pa urdhër të gjykatës, duke refuzuar të tregojë identifikimin dhe ka shkelur një sërë procedurash që janë të detyruar t'i ndjekin.

“Nisma e re shoqërore e dënon ashpër këtë ndalim, ndonëse nuk e konsideron surprizë, duke pasur parasysh atmosferën që mbizotëron në veri të Kosovës, ku qytetarët po frikësohen gjithnjë e më shumë se mos ndalohen pa arsye. Niveli aktual i mosbesimit mes qytetarëve dhe policisë është i paqëndrueshëm dhe kërkon masa urgjente për uljen e tensioneve. Sigurimi i mëtutjeshëm i integrimit të komunitetit serb, një çështje e cila në thelb ka karakter politik, hap mundësi për probleme të reja të sigurisë, dhe sigurisht që nuk do të çojë në zgjidhje të qëndrueshme politike”, bëhet e ditur nga Nisma e re shoqërore.