Odalloviq: Do të ketë probleme me dorëzimin e pushtetit në veri, me Kurtin nuk ka të ardhme

Kryetari i Komisionit për Personat e Zhdukur në Qeverinë e Serbisë, Velko Odalloviq, ka deklaruar se më e rëndësishmja është që serbët në Kosovë kanë zgjedhur përfaqësuesit e tyre në zgjedhjet lokale, por ka theksuar se pret probleme gjatë dorëzimit të pushtetit në veri, sepse beson se Albin Kurti do të bëjë gjithçka për t’ua vështirësuar serbëve marrjen e pushtetit. Odalloviq tha se rezultatet e raundit të dytë të zgjedhjeve lokale mund të përcaktojnë shumë gjëra në marrëdhëniet e ardhshme në nivele të tjera të pushtetit në Kosovë.

Në Kosovë sot po mbahet raundi i dytë i zgjedhjeve lokale në 18 komuna, përfshirë edhe një me shumicë serbe, në Kllokot.

“Sot do të zyrtarizohet 10 nga 10 (fitore të Listës Serbe). E rëndësishme është që serbët kanë zgjedhur përfaqësuesit e tyre dhe që kryetarët e zgjedhur të komunave kanë legjitimitet dhe legalitet,” tha Odalloviq për RTS.

Megjithatë, ai pret probleme gjatë dorëzimit të pushtetit.

“Do të ketë probleme, sigurisht, sepse Kurti po bën gjithçka për ta vështirësuar funksionimin e atyre institucioneve. Ashtu siç bëri gjithçka për të mbështetur funksionimin e atyre institucioneve të imponuara, ‘kryetarëve të kontejnerëve’, tani do të bëjë gjithçka që serbëve t’ua pengojë ose t’ua pamundësojë këtë proces,” paralajmëroi Odalloviq.

Ai theksoi se Kurti është njeriu që praktikisht e ka ndërprerë procesin e kërkimit për personat e zhdukur.

“Kur presidenti Vuçiq në Bruksel paraqiti detajet për atë që ne kemi bërë, dhe Kurti kuptoi se ata nuk kanë bërë asgjë, ai tërhoqi frenin e dorës dhe e ndërpreu gjithçka, madje edhe mua më ndaloi të shkoj në Kosovë. Ne kemi bashkëpunuar me institucionet në Prishtinë edhe gjatë kohës së Haradinajt, Thaçit, Mustafës dhe Hotit,” tha Odalloviq.

Duke komentuar vendimin e Vjosa Osmanit për t’ia besuar mandatin për formimin e qeverisë Glauk Konjufcës, ai tha se kjo është vetëm blerje kohe.

Odalloviq vlerësoi se raundi i dytë i sotëm i zgjedhjeve lokale është shumë i rëndësishëm, sepse rezultatet do të përcaktojnë marrëdhëniet e ardhshme në nivelet e tjera të pushtetit.

“Bëhet fjalë për një bast të madh. Sot zgjidhet kryetari i Prishtinës mes kandidatëve të LDK-së dhe Vetëvendosjes, në Mitrovicën e Jugut mes PDK-së dhe Vetëvendosjes, dhe gjithashtu në disa qytete të tjera. Nga mënyra se si do të formohet ambienti lokal, do të varen koalicionet e ardhshme. Pyetja është kush do ta mbështesë kë sot,” tha ai.

Ai beson se Kurti po përpiqet vetëm të blejë kohë, sepse nuk do të arrijë të formojë shumicën për qeverinë, duke pritur zgjedhjet e reja në fund të vitit.

“Është e qartë se ai synon fundin e vitit dhe kthimin e shqiptarëve nga diaspora, nga data 15 dhjetor, që atëherë të mbahen zgjedhjet. Nga 2,16 milionë votues, rreth 1,6 milionë janë në Kosovë. Shqiptarët nga diaspora zakonisht vijnë dy herë në vit dhe ky është moment i mirë për të, nëse diaspora llogarit tek ai,” ka thënë Odalloviq.

Ai tha se nuk ka të ardhme me Kurtin, sepse ai po thyen ura jo vetëm me serbët, por as me shqiptarët, duke marrë parasysh se gjithçka që bën nuk është në interesin e askujt, përveç të tijit.

Ai u zemërua me raportin e Komisionit Evropian për Kosovën, në të cilin, siç tha ai, Prishtina u kritikua se kishte shkuar shumë larg në masat që kishte marrë në veri, pa dënuar faktin se nuk duhej ta kishte bërë këtë.

"Një pjesë e bashkësisë ndërkombëtare e lejon atë ta bëjë këtë. Shpresoj se do të ndalet dhe se do të kthehemi te normalizimi. Normalizimi shkon përmes dialogut, dhe nuk ka dialog me Kurtin", përfundoi Odalloviq.