Opozita: Letra e shefit të Misionit të BE-së masë e re ndëshkuese për Kosovën dhe dëshmi se Kurti nuk ka legjitimitet në Bruksel

Partitë opozitare shqiptare paralajmërojnë se njoftimi i BE-së se përfaqësuesit e saj nuk do të takohen me përfaqësuesit e Kosovës në ndërtesën e qeverisë derisa të formohet ajo, paraqet një masë të re ndëshkuese nga Brukseli, por edhe “dëshmon” se Albin Kurti “nuk ka legjitimitet si ushtrues i detyrës së kryeministrit”.

Shefi i Misionit të BE-së, Aivo Orav, në një letër dërguar Prishtinës ka bërë të ditur se “BE-ja do të përmbahet përkohësisht nga takimet me kryeministrin në mandat teknik dhe me ministrat brenda ndërtesës së Qeverisë së Kosovës, derisa të formohet një qeveri me mandat të plotë”.

Deputeti i LDK-së, Armend Zemaj, vlerëson se këtë vendim duhet ta kuptojmë si një masë të re ndëshkuese kundër Kosovës.

„Kjo nuk është vetëm një masë, por pasojë e madhe për Kosovën, e cila pesë vjet ka qenë nën sanksione ekonomike, e tani kjo ndëshkim mund të quhet edhe si ndëshkim i BE-së kundër Kosovës, kundër Kurtit dhe qeverisë që do ta mbajë veten në pushtet ekzekutiv“, tha Zemaj për KosovaPress.

Ai kujtoi se edhe gjatë verifikimit të mandateve për legjislaturën e re, LDK-ja ka paralajmëruar se nuk është e mundur të ushtrohen dy funksione njëkohësisht: edhe ministër, edhe deputet.

„Ky është një ego i madh për pushtet dhe gjithçka lidhet me interesat elektorale dhe financiare. Tash kemi marrë këtë përgjigje nga BE-ja, e cila nuk hyn në funksionin e qeverisë së kryeministrit, por pavarësisht vendimit të Gjykatës Supreme, vazhdon të ushtrojë detyra ekzekutive në dëm të buxhetit të Kosovës“, theksoi Zemaj.

Deputetja e AAK-së, Time Kadrijaj, vlerëson se letra e BE-së është shqetësuese dhe se konfirmon që qeveria në mandat teknik nuk ka legjitimitet.

„Kjo është shqetësuese, duhet të jetë shqetësuese, sepse konfirmohet që kjo qeveri është ilegale dhe me dhunë mban peng menaxhimin e Kosovës. Nuk kanë mandat për këto funksione: as për pozitën e kryeministrit, as për postet ministrore“, u shpreh Kadrijaj.

Ajo pohon se Lëvizja Vetëvendosje me qëllim po e vonon procesin e konstituimit të parlamentit për të shtyrë fazën tjetër – zgjedhjen e qeverisë së re.

„Kosova është vend nën sanksione dhe sanksionet ndaj kësaj qeverie mbesin në fuqi për shkak të mosrespektimit të marrëveshjeve, por edhe për shkak të injorimit të koordinimit me faktorët ndërkombëtarë. Jemi nën sanksione tash e disa vite“, theksoi Kadrijaj për KosovaPress.