Pavkoviq: Vendimi i SHBA-së mund të shënojë fundin e ambicieve të Kurtit për të qëndruar në pushtet

Drejtori i strategjisë në Qendrën për Politika Evropiane, Millosh Pavkoviq, vlerëson se vendimi i Uashingtonit për të shtyrë për një kohë të pacaktuar dialogun strategjik të planifikuar me Kosovën është rezultat i veprimeve dhe deklaratave të kryeministrit në mandat teknik, Albin Kurti, të cilat, siç thekson ai, shkaktojnë paqëndrueshmëri dhe tensione, ashtu siç thuhet edhe në vetë komunikatën. Ai nënvizon se ky hap mund të dobësojë seriozisht mbështetjen për Vetëvendosjen dhe të shënojë fundin e ambicieve të Kurtit për të qëndruar në pushtet.

Në një deklaratë për Kosovo online, Pavkoviq tha se dialogu strategjik është një lloj instrumenti i politikës së jashtme amerikane që paraqet një platformë gjithëpërfshirëse për vendosjen e marrëdhënieve diplomatike me shtete të ndryshme të botës.

Ai thekson se ky partneritet SHBA e ka me rreth gjashtëdhjetë shtete në mbarë botën, por se është e rëndësishme të theksohet që ai përfshin një bashkëpunim të gjerë duke filluar nga politika, ekonomia e deri tek siguria.

„Kur flasim për Ballkanin Perëndimor, vetëm Maqedonia e Veriut ka këtë status në këtë instrument, pra në dialogun strategjik, që nga viti 2021. Ai ishte planifikuar edhe për Serbinë dhe për Kosovën, ndërsa tani për Kosovën shtyhet. Mesazhi kyç dhe shkaku i këtij vendimi është pikërisht ajo që thuhet edhe në komunikatë – deklaratat e kryeministrit në mandat teknik, Albin Kurti, të cilat shkaktojnë paqëndrueshmëri dhe që janë bërë aktuale ditët e fundit“, thekson Pavkoviq.

Ai kujtoi se këto deklarata janë shoqëruar edhe me veprime që rrisin tensionet në terren dhe ndikojnë në marrëdhëniet ndëretnike dhe tensionet në vetë Kosovën.

„Kjo ka të bëjë edhe me mbylljen e postës në Graçanicë, respektivisht zyrës së RFZO-së në Mitrovicën e Veriut, si edhe me një sërë aksionesh të drejtuara kundër komunitetit serb – mbylljen e institucioneve serbe dhe përpjekjen për të ndaluar pjesëmarrjen e Listës Serbe në zgjedhjet lokale. Të gjitha këto janë arsyet dhe konteksti që kontribuan në këtë vendim radikal të administratës amerikane, respektivisht ambasadës së SHBA në Prishtinë“, thekson Pavkoviq.

Ai konsideron se Kurti as pas këtij vendimi nuk do ta ndryshojë kursin, pasi, siç thotë, është treguar se politika e tij është „rezistente ndaj çfarëdo zhvillimesh nga jashtë“.

„Mendoj se ky vendim mund të ndikojë në mbështetjen e votuesve ndaj Vetëvendosjes dhe se do të jetë një goditje e konsiderueshme, duke pasur parasysh se nesër nis fushata për zgjedhjet lokale, ndërsa Kuvendi ende nuk është konstituuar dhe zgjedhjet e parakohshme parlamentare janë në ajër. Kjo është diçka që mund të godasë Kurtin dhe trupin e tij elektoral dhe në fakt mund të nënkuptojë fundin e ambicieve të tij për të qëndruar në pushtet në Kosovë“, përfundon Pavkoviq.