Petkoviq: Fitorja e Listës Serbe është pengesë ndaj terrorit të Kurtit, e rëndësishme të fitojë të dhjetë mandatet

Drejtori i Zyrës për Kosovë dhe Metohi, Petar Petkoviq, deklaroi se zgjedhjet në Kosovë më 28 dhjetor janë shumë të rëndësishme për mbijetesën e popullit serb në Kosovë, prandaj është me rëndësi vendimtare që Lista Serbe të fitojë dhe të sigurojë të dhjetë vendet e garantuara në parlamentin e Prishtinës.

“Fitorja e Listës Serbe është pengesë ndaj terrorit të Kurtit dhe politikës së tij antiserbe”, tha Petkoviq duke qenë i ftuar në Ditarin e Mëngjesit të RTS-it.

Ai tha se është e rëndësishme të shihet kë Kurti e mbështet, sepse kështu bëhet e qartë se kush vepron kundër interesave serbe.

“Nga ana tjetër, kur shihni kë Kurti e sulmon, është e qartë se kush lufton për interesat e popullit serb në Kosovë dhe Metohi. Prandaj presidenti Aleksandar Vuçiq dhe Lista Serbe janë shënjestra kryesore e Kurtit. Vuçiq kujdeset për interesin e çdo serbi në Kosovë dhe Metohi dhe lufton për interesat kombëtare serbe. Nga ana tjetër, kur Kurti mbështet Rashiqin dhe bllokuesit në Serbinë qendrore, është e qartë se ata punojnë drejtpërdrejt për dobësimin e Serbisë. Nuk ka gjë që Kurti nuk ia ka bërë Listës Serbe për ta ndaluar atë – mund të shkruhej një libër për këtë – por pavarësisht gjithçkaje, Lista Serbe arriti të mbijetojë, të forcohet edhe më shumë dhe të dalë në këto zgjedhje. Bëhet fjalë për ciklin e tretë zgjedhor për më pak se një vit”, theksoi drejtori i Zyrës për KdheM.

Ai shtoi se kjo tregon se që nga shkurti ekziston një krizë serioze politike në Kosovë, për shkak të së cilës, sipas vlerësimit të tij, Kurti është nervoz.

“Për të, këto zgjedhje janë çështje jete a vdekjeje në kuptimin politik. Është e rëndësishme që në këto zgjedhje të gjithë serbët të dalin dhe t’i përgjigjen thirrjes së presidentit Aleksandar Vuçiq për të votuar Listën Serbe, sepse ajo është e vetmja që lufton për interesat serbe”, tha Petkoviq.

Ai përsëriti se në zgjedhjet lokale Lista Serbe fitoi bindshëm dhe siguroi dhjetë komuna në Kosovë.

“Ajo arriti të fitojë katër komuna në veri dhe të konfirmojë fitoren në gjashtë komuna në jug të Ibrit. Më në fund u pamë shpinën gauleiterëve të Kurtit në katër komunat në veri. Tani është e rëndësishme të fitojmë të gjitha dhjetë mandatet në parlamentin e Prishtinës, sepse vetëm kështu do të mund të pengojmë të gjitha proceset që mund të jenë negative për serbët. Prandaj Kurti bëri gjithçka për t’ua marrë serbëve atë një mandat dhe për t’ia dhënë Rashiqit, për të cilin votuan shqiptarët. Kur Lista Serbe i ka të dhjetë mandatet në parlamentin e Prishtinës, gjërat janë krejtësisht ndryshe”, tha ai.

Ai shtoi se për presidentin e Serbisë, Aleksandar Vuçiq, çështja e Kosovës nuk është temë që shërben për pazare politike.

“Është e rëndësishme të thuhet se Lista Serbe dhe uniteti ynë serb janë dëshmi se, pavarësisht terrorit të Kurtit, mbylljes së institucioneve serbe, arrestimeve të popullit serb, frikësimit të serbëve dhe militarizimit të veriut, Kurti nuk ka arritur t’ia thyejë shtyllën kurrizore popullit serb. Serbët janë ngritur dhe kanë treguar unitet”, theksoi drejtori i Zyrës për Kosovë dhe Metohi.

Petkoviq përsëriti se është shumë e rëndësishme që të gjithë personat e zhvendosur brenda vendit që kanë dokumente të Kosovës të shkojnë në Kosovë dhe të votojnë për Listën Serbe, duke rrethuar numrin 127.

“Çdo votë është e rëndësishme. Nuk guxojmë t’i lejojmë Rashiqit apo kujtdo tjetër të përfaqësojë popullin serb. Përfaqësuesi i vetëm legjitim është Lista Serbe. Nëse shqiptarët nga diaspora kanë mundur të vijnë në Kosovë për të votuar, po aq e rëndësishme është që tani të gjithë serbët nga Serbia qendrore të shkojnë në Kosovë dhe Metohi”, theksoi Petkoviq.

I pyetur të komentojë largimin e Sllagjana Nikollçeviqit dhe Gordana Mihajlloviqit nga partia e Nenad Rashiqit, Petkoviq tha se kjo është shumë domethënëse.

“Ata treguan fytyrën e vërtetë të partisë së Nenad Rashiqit. Kjo parti ndikon drejtpërdrejt në përçarjet brenda shoqërisë serbe në Kosovë dhe Metohi. Kur njerëz të tillë, që janë anëtarë të lartë të partisë, dalin dhe thonë se politika e vetme e vërtetë që lufton për mbijetesën e serbëve në Kosovë dhe Metohi është politika e Aleksandar Vuçiqit, kjo është shumë e rëndësishme. Jam i kënaqur kur çdo serb i bashkohet unitetit serb, sepse ne nuk kemi luksin të ndahemi në Kosovë dhe Metohi”, theksoi ai.

Ai përsëriti se nëse Lista Serbe i fiton të gjitha dhjetë mandatet e rezervuara për serbët në parlamentin e Prishtinës, kjo do të thotë se përfaqësuesit legjitimë të popullit serb do të mund të luftojnë për interesat e tij, sepse ato vende janë të parashikuara pikërisht për serbët.

“Çfarë ndodhi pas zgjedhjeve të shkurtit? Për Rashiqin votuan më shumë se 500 shqiptarë në mjedise ku serbët janë spastruar etnikisht që nga lufta – në Kaçanik, Podujevë dhe Gjakovë – dhe kështu Kurti bëri të mundur që Rashiqi të fitojë një mandat. E si mund t’i përfaqësojë ai interesat legjitime të serbëve kur për të kanë votuar shqiptarët? Ai do të udhëhiqet nga interesat e shqiptarëve. Prandaj është e rëndësishme që Lista Serbe t’i fitojë të gjitha dhjetë mandatet, që të gjithë serbët dhe personat e zhvendosur brenda vendit të votojnë për Listën Serbe, në mënyrë që vetëm serbët të vendosin për interesat e tyre. Lista Serbe është e lidhur me Beogradin me ‘kordonin e kërthizës’, ajo e sheh ekskluzivisht Beogradin si kryeqytetin e saj dhe presidentin Vuçiq si presidentin e saj”, përfundoi Petkoviq.