Petkoviq: Kundër kujt është drejtuar militarizimi i Prishtinës, nëse jo kundër popullit serb

Drejtori i Zyrës për Kosovë dhe Metohi, Petar Petkoviq, ka deklaruar se Turqia, duke armatosur Prishtinën dhe duke dërguar më shumë se 1.000 dronë në Kosovë, ka shkelur drejtpërdrejt Rezolutën 1244 të Këshillit të Sigurimit të OKB-së, sipas së cilës KFOR-i është e vetmja forcë e armatosur në Kosovë.

“Në vend që të respektojë të drejtën ndërkombëtare, Turqia, me militarizimin e Prishtinës që po zgjat prej disa vitesh, po shkel drejtpërdrejt Kartën e OKB-së dhe po bëhet bashkëfajtore me Kurtin në minimin e paqes dhe stabilitetit në rajonin e Ballkanit Perëndimor,” tha Petkoviq në një deklaratë.

Ai paralajmëroi se me këtë veprim të rrezikshëm, Turqia ka treguar se është problemi më i madh për stabilitetin në rajon dhe se nuk dëshiron paqe, por përmes zhurmës së armëve kërkon të shkaktojë tensione dhe kriza të reja.

Petkoviq pyeti gjithashtu kundër kujt është drejtuar ky militarizim i Prishtinës dhe dhënia e armëve vdekjeprurëse në duart e “piromanit” Albin Kurti, nëse jo kundër popullit paqedashës serb.

“Nuk është rastësi që dronët iu dorëzuan Kurtit tre muaj para afatit dhe vetëm disa ditë para zgjedhjeve lokale, për t’i dhënë mbështetjen e nevojshme urrejtësit të serbëve Kurti para zgjedhjeve të 12 tetorit, në mënyrë që ai të vazhdojë të terrorizojë popullin serb,” është i bindur Petkoviq.

Ai shtoi se Beogradi e ka kuptuar mirë mesazhin dhe do të vazhdojë të ruajë me përgjegjësi paqen dhe stabilitetin, pavarësisht aleancave ushtarake që po krijohen në dëm të paqes dhe që paraqesin një kërcënim të drejtpërdrejtë.

“Kujtoj se me Rezolutën 1244 është paraparë demilitarizimi i të ashtuquajturës UÇK dhe forcave të Prishtinës, dhe ky veprim i Turqisë përbën shkatërrim të drejtpërdrejtë të këtij dokumenti ndërkombëtar,” shtoi Petkoviq.

Turqia në tetor ka marrë përsëri komandën rotuese të KFOR-it në Kosovë dhe, njëkohësisht, vitin e ardhshëm do të jetë nikoqire e samitet të NATO-s, për çka ka raportuar më herët edhe Kosovo online.