Petkoviq me Shin: Presim që raporti i UNMIK-ut të paraqesë gjendjen reale në terren

Drejtori i Zyrës për Kosovë dhe Metohi, Petar Petkoviq, është takuar me Zëvendës Përfaqësuesin Special të Sekretarit të Përgjithshëm të OKB-së dhe Ushtruesin e detyrës së shefit të Misionit të OKB-së në Kosovë (UNMIK), Milbert Dongjoon Shin, të cilin e ka njoftuar për situatën politike dhe të sigurisë në Kosovë dhe, siç është theksuar në njoftimin e Zyrës për KdheM, për veprimet e njëanshme dhe përshkallëzuese të Prishtinës që synojnë dëbimin e popullit serb nga Kosova.

Me atë rast, Petkoviq i ka shprehur falënderim Shinit për angazhimin e rëndësishëm të Misionit të UNMIK-ut, duke theksuar rëndësinë e këtij misioni për popullin serb në Kosovë, si dhe rëndësinë e respektimit të Rezolutës 1244, dhe ka shprehur pritjen që raporti gjashtëmujor i këtij misioni, i cili do të paraqitet në seancën e ardhshme të Këshillit të Sigurimit të OKB-së, të pasqyrojë gjendjen reale në terren dhe shembujt e shumtë të shkeljeve të të drejtave të njeriut ndaj serbëve në Kosovë.

Ai ka përcjellë se populli serb në Kosovë e vlerëson përpjekjen e Misionit të UNMIK-ut dhe pret angazhim edhe më të fortë dhe mbështetje për problemet me të cilat përballet çdo ditë.

“Terrori i Prishtinës është intensifikuar sidomos para zgjedhjeve lokale në Kosovë dhe Metohi, të caktuara për 12 tetor, sepse Albin Kurti, përmes represionit, ngritjes së tensioneve dhe krijimit të krizave, dëshiron ta frikësojë popullin serb dhe me mekanizma të ndryshëm të pengojë serbët të zgjedhin përfaqësuesit e tyre legjitimë dhe të ruajnë e rikthejnë komunat me shumicë serbe. Në këtë drejtim, theksoi Petkoviq, është me rëndësi që edhe UNMIK-u të bëjë gjithçka nga ana e vet për të mbrojtur vullnetin zgjedhor të popullit serb në Kosovë,” thuhet në njoftimin e Zyrës për KdheM.

Siç shtohet më tej, Petkoviq ka theksuar se serbëve në Kosovë u janë cenuar të drejtat elementare të njeriut.

“Prishtina po shkel edhe rregullat e veta vetëm për të marrë dhe zbatuar vendime që çojnë drejt mohimit të plotë të të drejtave të popullit tonë. Që nga ardhja e Kurtit në pushtet, kemi pasur pothuajse 700 incidente me motiv etnik,” ka paralajmëruar Petkoviq, duke theksuar se kjo reflektohet në mbylljen e shumë institucioneve që ofronin shërbime thelbësore për popullin serb, veçanërisht për kategoritë sociale më të rrezikuara dhe për të moshuarit, si dhe në arrestimet arbitrare, ndalimin e simboleve serbe në Kosovë dhe në dhunën institucionale e fizike.

Petkoviq ka theksuar se Prishtina nuk është e interesuar për paqe, normalizim të marrëdhënieve apo bashkëjetesë, por se, pavarësisht pengesave të shumta, Beogradi mbetet i përkushtuar ndaj dialogut si kuadri i vetëm për zgjidhjen e të gjitha problemeve në terren.