Petkoviq: Me një udhëzim administrativ, Kurti dëshiron të mbajë kryekomunarët e rrejshëm dhe të shmangë zgjedhjet

Drejtori i Zyrës për Kosovë dhe Metohi, Petar Petkoviq, ka vlerësuar se qëndrimi i Prishtinës se zgjedhjet lokale në katër komuna në veri të Kosovës mund të mbahen vetëm në bazë të udhëzimeve administrative, tregon se kryeministri i Kosovës, Albin Kurti nuk dëshiron t'i mbajë ato zgjedhje dhe thekson se zgjedhjet janë zgjidhja e vetme për deeskalim të menjëhershëm.

Petkoviq thekson se Kurti po kërkon të gjitha mënyrat e mundshme për t'i shmangur dhe shtyrë zgjedhjet sepse e di se "serbët do t'i përdorin ato për t'i dhënë fund gauleiterit të tij".

“I ashtuquajturi udhëzim administrativ nuk është gjë tjetër veçse mënyra se si Kurti dëshiron të mbajë me çdo kusht kryekomunarët e rrejshëm dhe këshilltarët e tyre që pushtuan veriun. Gauleiterët të Kurtit, të cilët fituan 3.5 për qind të votave të shqiptarëve në zgjedhjet e kontejnerëve në veri, nuk përfaqësojnë askënd dhe nuk kanë asnjë legjitimitet”, njoftoi Zyra për Kosovë dhe Metohi.

Siç shtoi ai, terrori që Kurti e intensifikoi deri në padurueshmëri, sidomos pas atyre zgjedhjeve jolegjitime, ka për qëllim spastrimin etnik të popullit serb, veçanërisht nga veriu i Kosovës.

Për shkak të presionit dhe dhunës së paparë të Policisë së Kosovës ndaj serbëve, zgjidhja e vetme për deeskalim të menjëhershëm është mbajtja e zgjedhjeve në veri, thekson Petkoviq, dhe shton se zgjedhjet janë kushti i vetëm për tërheqjen e menjëhershme të policisë speciale të Kurtit.

“Në vend që të organizohen zgjedhje në të cilat do të marrin pjesë serbët, Kurti me udhëzimet e tij administrative e ndërlikoi qëllimisht situatën, duke futur një procedurë të pakuptimtë që përfshin një lloj peticioni, pastaj deklaratën e referendumit dhe në fund mbajtjen e zgjedhjeve, të gjitha me afate të gjata. Me këtë, Kurti në mënyrë më të drejtpërdrejtë i ka gënjyer përfaqësuesit e BE-së dhe SHBA-së, duke qenë se publikisht ka premtuar organizimin e zgjedhjeve”, tha drejtori i Zyrës Qeveritare për Kosovë e Metohi.

Siç përfundon ai, nuk është për t'u habitur sepse të gjithë e panë se Kurti nuk është paqebërës, por zjarrvënës ballkanik, që nuk dëshiron zgjedhje në veri dhe që personalisht ka urdhëruar kryekomunarët e tij të rrejshëm të mos japin dorëheqjen.