Petkoviq: Nëse Kurti ndalon përdorimin e dinarit, është e qartë se ai nuk dëshiron paqe

Drejtori i zyrës për Kosovë dhe Metohi, Petar Petkoviq, ka deklaruar se ditët e kaluara ka pasur bisedime me përfaqësues të shumtë ndërkombëtarë për çështjet urgjente dhe mbijetesën dhe qëndrimin e popullit serb në Kosovë duke marrë parasysh lëvizjet e shumta të përshkallëzuara dhe të dhunshme që ka bërë kryeministri i Kosovës, Albin Kurti, “për t'i dëbuar, për të anuluar dialogun dhe për të zbatuar ‘politikën e tij të Shqipërisë së Madhe’”.

“Në takimin e djeshëm me Lajçakun e kemi përcjellë shqetësimin serioz të Beogradit lidhur me pozitën dhe situatën e vështirë në të cilën ndodhet populli serb jo vetëm në veri por edhe në jug të Ibrit, veçanërisht në dritën e mesazhit të Albin Kurtit dhe autoriteteve në Prishtinë për të anuluar dinarin serb dhe transaksionet e pagesave në zonën e Kosovës dhe Metohisë”, tha Petkoviq.

Ai theksoi se në të gjitha takimet me përfaqësues të bashkësisë ndërkombëtare janë diskutuar për incidente dhe sulme të shumta ndaj popullit serb që janë rezultat i retorikës antiserbe të kryer nga Prishtina.

Ai ka theksuar se sipas Rezolutës 1244, Prishtina nuk ka të drejtë ndaj FSK-së, si dhe ndaj forcave speciale që ndodhen në veri të Kosovës, gjë që, siç thekson ai, thuhet qartë në Marrëveshjen e Brukselit. Ai tha se pavarësisht çdo gjëje, Beogradi do të vazhdojë me luftën e tij diplomatike për ruajtjen e paqes.

“Serbia do të bëjë gjithçka për të ruajtur popullin serb në Kosovë dhe Metohi dhe do të vazhdojmë luftën tonë të fortë diplomatike në kuadër të dialogut për të ruajtur paqen”, theksoi Petkoviq.

Ai beson se vendimi i Prishtinës për heqjen e dinarit është goditja e fundit për popullin serb në Kosovë.

“Jemi përballë një njeriu që po bën gjithçka për të vazhduar proceset e përshkallëzuara”, paralajmëroi Petkoviq.

Ai shtoi se presidenti i Serbisë, Aleksandar Vuçiq, ka insistuar në formimin e BKS-së në takimet me përfaqësuesit e bashkësisë ndërkombëtare për të mundësuar të drejtat e popullit serb dhe shtoi se Serbia po avokon për organizimin e zgjedhjeve të reja në katër komuna në veri të Kosovës.

Duke komentuar njoftimin e Quint-it për heqjen e dinarit në Kosovë, Petkoviq ka shprehur besimin se çështja do të zgjidhet. Ai ka theksuar se nuk është hera e parë që lexojmë njoftime të ndryshme të Quint-it për sfidimin e vendimeve të kundërligjshme të Prishtinës dhe se çdo gjë ka përfunduar kryesisht me paralajmërime.

“Kësaj radhe deklarata është ndryshe, do të shohim, kemi bërë gjithçka për t'i shpjeguar të gjithëve pasojat katastrofike të heqjes së dinarit dhe se është çështje e mbijetesës së popullit serb në Kosovë dhe Metohi. Nëse Kurti nuk e ndal dhe fillon të ballafaqohet me Postën e Serbisë, është e qartë se ky njeri nuk do paqe”, tha Petkoviq.

Ai tha se Serbia do të qëndrojë pranë popullit të saj dhe se do të vazhdojë ta zgjidhë këtë çështje në mënyrë që asnjë nga serbët të mos kërcënohet.