Petkoviq: Prishtina sërish ka refuzuar të gjitha propozimet për zgjidhjen e çështjes së dinarit

Drejtori i Zyrës për Kosovë dhe Metohi, Petar Petkoviq, ka deklaruar sot pas diskutimeve disa orëshe për dinarin në Bruksel, se Prishtina sërish i ka refuzuar të gjitha propozimet, madje në dialog ofron më pak se sa parashikojnë rregulloret e tyre në Kosovë. Serbia, tha ai, nuk do të heqë dorë nga kërkimi i zgjidhjes për dinarin dhe lufta për serbët në Kosovë.

“Një ditë tjetër e gjatë dhe e lodhshme në Bruksel, për më shumë se nëntë orë në ndërtesën e Shërbimit Evropian për Punë të Jashtme, diskutuam për përdorimin e dinarëve, gjegjësisht për vendimin e njëanshëm të Albin Kurtit, i cili e hoqi atë dhe ua pamundësoi serbëve në Kosovë e Metohi marrjen e të ardhurave. Edhe pse pala jonë ishte përsëri konstruktive, doli me propozime të reja dhe tregoi se donte të arrinte një marrëveshje, me gjashtë propozime të reja konstruktive – Prishtina i refuzoi të gjitha”, tha Petkoviq.

Ai deklaroi se Beogradi nuk e mbylli derën për bisedime sepse dëshiron të gjejë një zgjidhje, pa të cilën serbët në Kosovë po vështirësohen çdo ditë e më shumë.

“Do të qëndrojmë sa të duhet në Bruksel, do të vijmë sa herë të jetë e nevojshme, do të kërkojmë zgjidhje”, ka theksuar Petkoviq.

Ai gjithashtu përcolli se Mirosllav Llajçak vlerësoi tre pyetje si vendimtare, si dhe se pala serbe është e gatshme të pajtohet me këtë për të ecur përpara, por që negociatori i Prishtinës Besnik Bislimi i ka vlerësuar ato çështje si të parëndësishme.

“Ne i kemi ofruar zgjidhjet të jenë modele që kemi aplikuar në marrëveshjet e mëparshme – dhe ai refuzoi. Ata refuzojnë çdo gjë, nuk do të bien dakord për asgjë. Ata duan të na ofrojnë më pak në dialog në krahasim me atë që lejojnë rregulloret e tyre. Është e qartë se në çfarë çon kjo”, theksoi Petkoviq.

Siç tha ai, kur Llajçak e pyeti se sa kohë dhe në çfarë mënyre do të flisnin, kur Prishtina nuk pranoi asgjë - ai vetëm ngriti supet.

"Si do të zhvillohen më tej gjërat - do ta shohim. Nuk do të dorëzohemi, nuk do të jemi pala që mbyll derën, do të luftojmë që populli ynë në Kosovë, që çdo njeri në Kosovë të marrë rroga, pensione, beneficione sociale. Do të luftojmë për interesat tona, për të siguruar një të ardhme të sigurt për serbët në Kosovë dhe Metohi. Do të shohim se çfarë do të bëjë Prishtina dhe si do të sillet”, tha Petkoviq.

Ai shtoi se do të luftojë për të gjetur një zgjidhje për dinarin, i cili duhet t'i ndihmojë popullit serb në Kosovë, i cili nuk është në kundërshtim me interesat kombëtare, por edhe lejon një kompromis.

“Ne po mundohemi të shfrytëzojmë dialogun, të bisedojmë, të sigurojmë mbijetesën e serbëve në Kosovë, ndryshe nga Kurti që po përpiqet të dëbojë serbët”, tha Petkoviq.

Ai gjithashtu deklaroi se delegacioni i Beogradit shprehu një protestë të fortë kundër ndalimit të Prishtinës që Patriarku i KOS Porfiri të shkojë në Patriarkanën e Pejës, në shtëpinë e tij, në të cilin duhej të mblidhej Kuvendi i Kishës Ortodokse Serbe.

“E kemi theksuar qartë se kjo nuk është vetëm shkelje e marrëveshjes për vizita zyrtare, por se është shkelje e të drejtave të njeriut dhe fetare në Kosovë”, nënvizoi drejtori i Zyrës për Kosovë dhe Metohi.

Ai po ashtu i ka treguar Llajçakut se shfaqja “Libri për Milutinin” ishte ndaluar dhe ndalimi i aktorit Nenad Jezdiq për të ardhur të luajë atë monodramë, por edhe atë që Prishtina po u bën gazetarëve në Kosovë kur është fjala për gazetën "Jedinstvo".

"Kjo është hera e dytë që po i dëbojnë me forcë, hera e parë në vitin 1999 u dëbuan me forcë nga Prishtina dhe tani po përpiqen t'i dëbojnë nga objektet e tyre në Mitrovicën veriore të Kosovës," përkujtoi Petkoviq.

Ai po ashtu ka deklaruar se edhe këtë herë, si dhe herën tjetër, temë kyçe ka qenë Bashkësia e Komunave Serbe, për të cilin Beogradi insiston me këmbëngulje.

“Bashkësia e Komunave Serbe, e cila duhet të themelohet, është një çështje mbi të gjitha, sepse nënkupton mbijetesën e serbëve në Kosovë dhe Metohi. Ne folëm edhe për faktin se Prishtina ka 10 muaj që mban embargo ndaj mallrave serbe dhe po shkel të gjitha vlerat më elementare evropiane”, tha Petkoviq.

Ai shtoi se pret ftesë nga Mirosllav Llajçak për vazhdimin e negociatave.

“Kur - kjo i takon atij ta përcaktojë, dhe ne do të përgatisim komente shtesë për të përfunduar detyrën tonë, siç kemi bërë çdo herë deri më tani”, përfundoi Petkoviq.