Policët e Kosovës kanë rrahur brutalisht të arrestuarin Dushan Obrenoviq

Avokati Predrag Milkoviq, i cili përfaqëson Dushan Obrenoviqin, i cili u arrestua dje në Zveçan, tha se klienti i tij është rrahur brutalisht nga pjesëtarët e Policisë së Kosovës.

“Mbrëmë vonë u angazhua nga familja dhe e vizitova në stacionin policor në pjesën jugore të Mitrovicës. Dushan Obrenoviq është rrahur keq dje nga policia e Kosovës gjatë arrestimit të tij dhe siç thotë ai, kur është sjellë në stacionin e policisë. Ka pësuar lëndime të ndryshme në kokë, prerje, çarje, hematoma në kokë. Është rrahur keq dhe brutalisht. Është rrahur aq keq sa për pak bën jashtëqitjen. Më tha mbrëmë se ai ishte rrahur edhe këtu në ndërtesën e komunës kur u arrestua”, tha Milkoviq.

Ai shtoi se Obrenoviq akuzohet për veprën penale “Nxitja e rezistencës dhe rrezikimi i personit nën mbrojtje ndërkombëtare”.

“Unë e kuptoj që dikush mund të jetë i dyshuar dhe i arrestuar, por të rrihet ashtu, të rrihet brutalisht kështu... Unë i bëj thirrje komunitetit ndërkombëtar, i bëj thirrje policisë, gjyqësorit, të kenë një pasqyrë për të parë se çfarë po bëhet dhe t'i jepet fund kësaj. Të lutem të gjithë ta kuptojnë se Dushan Obrenoviq është një djalë i ri i cili ishte aty për të shprehur një protestë paqësore, por askush nuk meriton të rrihet kështu në shekullin 21. Ai u ekzaminua nga një mjek dhe madje edhe mjeku, me aq sa kam mundur të lexoj, ka shkruar se është e nevojshme të konsultohet me kirurg. Nuk jam i sigurt se është konsultuar me kirurg”, ka shtuar Milkoviq.

Milkoviq theksoi se sapo ishte nisur për të vizituar Obrenoviqin dhe për të parë se si po kalonte dhe nëse kishte marrë ndonjë lëndim të ri që nga mbrëmja.

Siç ka shtuar ai, Obrenoviqit i është shqiptuar masa e ndalimit nga policia për 48 orë, ndërsa nga prokurori varet nëse do të sillet para gjykatës.