Popoviq: Zhvendosja e monumentit për ushtarët serbë është mosrespektim i historisë dhe traditës serbe

Zhvendosjen e monumentit kushtuar ushtarëve serbë të vrarë në Luftën e Parë Botërore, në pjesën ushtarake të varrezave ortodokse të Prishtinës, Srgjan Popoviq, anëtar i kryesisë së Listës Serbe, e sheh si një formë tjetër të mosrespektimit të historisë dhe traditës serbe.

Monumenti i ushtarëve serbë të vrarë në Luftërat Ballkanike dhe Luftën e Parë Botërore nuk është më në vendin ku qëndronte, në pjesën qendrore të varrezave ushtarake ortodokse në Prishtinë dhe kjo është vënë re pasi ambasadorët e Gjermanisë dhe Francës në Kosovë kanë publikuar një fotografi të festës së përbashkët të Ditës së Armëpushimit në varrezat e lartpërmendura.

Popoviq thekson se parakusht themelor për çdo jetë ndëretnike dhe bashkëjetesë ndërmjet serbëve dhe shqiptarëve është respektimi i historisë, zakoneve dhe traditave të kombit tjetër.

“Me këtë ata treguan se nuk e respektojnë historinë tonë dhe për këtë flet edhe numri i madh i pllakave përkujtimore të shkatërruara nëpër varrezat serbe, të cilat askush nga komuniteti serb nuk mund t'i kuptojë”, tha ai.

Popoviq paralajmëron se historia nuk mund të rishkruhet dhe se duhet të respektohet.

“Ajo që i habiti të gjithë ishte se ushtria serbe dhe franceze sapo hynë në Prishtinë, hynë si çlirimtarë dhe askush nuk mund ta injorojë këtë fakt dhe askush nuk mund ta rishkruajë historinë, sepse ajo thjesht është e shkruar. Shpresoj që pllaka përkujtimore do të kthehet në vendin e saj, dhe ne nuk do të heqim dorë nga fakti se thjesht historia duhet respektuar dhe gjithçka duhet të jetë si më parë”, tha Popoviq.

Ai gjithashtu thekson se ndaj gjërave të tilla duhet të reagojë edhe bashkësia ndërkombëtare.

“E gjithë kjo që po ndodh nuk mund të kalojë pa u vënë re nga komuniteti ndërkombëtar. Mendoj se bashkësia ndërkombëtare duhet të ndikojë në shumë gjëra dhe nuk duhet të lejojë që të kalojë mbi të vdekurit, për të arritur disa qëllime politike dhe kombëtare”, përfundoi Popoviq.