Rrëfimi i Marko Rakiqit nga Leposaviqi: Vëllai im është arrestuar në Gjakovë për vegla për frutikulturë

Vëllai im dhe tre shokë morën pjesë në liturgjinë e mbrëmjes në Deçanin e Lartë, pas së cilës shkuan në Seminarin Teologjik të Prizrenit. Ata vizituan vendet tona të shenjta. Policia i ndaloi në Gjakovë dhe gjatë kontrollit të automjetit që e drejtonte, në bagazhin e tij gjeti një çantë me mjete që i përdorim në pemëtari, sepse unë dhe vëllai im kemi disa hektarë pronë nën fruta, tha për Novosti-n Marko Rakiq nga Leposaviqi, vëllai i të cilit është arrestuar në Gjakovë me tre serb të tjerë.

"Ai komplet mund të blihet në çdo pikë karburanti. Por, pas arrestimit të tyre, fillon ndjekja mediatike e politikanëve shqiptarë se ata janë spiunë, se posedojnë harta dhe armë të ftohta, fillimisht urdhërohen të ndalohen nga policia, e më pas të ndalohen deri në 30 ditë. Kjo është e padëgjuar", thotë Rakiq.

Vëllai i tij Branko së bashku me tre serbë të tjerë u arrestuan gjatë fundjavës dhe autoritetet e Prishtinës i shpallën menjëherë terroristë. Përveç Rakiqit, kapiteni i ushtrisë serbe, Millovan Steviq (ai punon si stomatolog në Akademinë Mjekësore Ushtarake) nga fshati Borçani në veri të Kosovës, Nemanja Vamoviq, një pylltar nga Novi Sadi dhe Pavle Kragoviç, i cili punon në Kragujevc dhe prindërit e të cilit jetojnë në Zubin Potok, të cilët gjithashtu shpesh i viziton.

Rakiq tha se vëllai i tij Branko (47) kohët e fundit ka pasur një operacion të rëndë në zemër, për të cilin ata kanë dorëzuar në gjykatë të gjitha të dhënat mjekësore dhe listën e lirimit. Ai pyet veten se si është e mundur që një njeri me një gjendje kaq të rëndë të jetë i prangosur pas shpine, por para së gjithash, si është e mundur të arrestohet dhe të ndalohet për posedim të një mjeti frutikulturës?!

"Edhe pse vëllai im tha në gjyq se ishte vegla e tij shtëpiake dhe iu lut gjykatës që t'i linte të tjerët të iknin sepse nuk kishin të bënin me të, as kjo nuk ia vlente. Më pas pyeti trupën gjykuese nëse duhej të kishte leje për atë mjet, por nuk mori përgjigje. Disa prej nesh ishim para gjykatës, policia na kontrolloi dy herë, por nuk deshën të na lejojnë për të përciell gjykimin”, tha Rakiq.

Ai thekson se të katër të arrestuarit janë para së gjithash njerëz serioz familjar dhe të nderuar, qytetarë akademikë, besimtarë, por edhe persona pa asnjë kundërvajtje, e aq më pak vepër penale. Pas gjykimit, thotë ai, seanca ka zgjatur më shumë se tre orë dhe me sa duket për shkak të presionit të madh politik dhe mediatik është caktuar masa e paraburgimit.

"Ata u lanë në paraburgim pa asnjë provë fajësie, të cilën në fakt nuk e kishin. Madje iu ofrua lirim me kusht, por u refuzua, padyshim me qëllimin për t'i paraqitur serbët si të këqij. Nuk ia vlente që Branko t'i njoftonte se më pak se dy muaj më parë kishte një operacion të rëndë në zemër", thotë Rakiq.

Ndryshe, policia e Kosovës të dielën ka ndaluar në Prizren 12 pelegrinë nga Serbia qendrore, të cilët ishin duke vizituar vendet e shenjta në këtë qytet, dhe siç raportojnë mediat elektronike në Kosovë, të gjithë janë liruar, ndonëse dy prej tyre paraprakisht janë ndaluar nga policia deri në 48 orë.