Simiq: Po shkoj në dëgjimin me kokën lart sepse nuk kemi bërë asgjë të kundërligjshme, vendi ynë ishte pranë popullit ton

Para seancës dëgjimore në Prokurorinë Speciale të Kosovës në cilësinë e të dyshuarit për, siç thuhet, sulm ndaj rendit kushtetues të Kosovës dhe vepra të tjera penale në lidhje me protestat e dhjetorit 2022, anëtari i Kryesisë së Listës Serbe, Igor Simiq, deklaroi se po shkon me kokën lart, sepse e di që ai dhe anëtarët e tjerë të Listës Serbe, si përfaqësues politikë, kanë qenë dhe mbeten pranë popullit të tyre.

Simiq përsëriti se ai dhe Lista Serbe gjithmonë kanë qenë për paqe, kanë bërë thirrje për qetësi dhe përmbajtje, dhe gjithmonë kanë bërë gjithçka që kanë pasur në dorë si parti politike për të ruajtur paqen në Kosovë.

“Hyjmë në këtë proces dhe japim këtë deklaratë jo sepse besojmë se ai proces është i drejtë apo se bazohet në ndonjë provë për ndonjë faj të cilitdo nga të dyshuarit serbë – që janë mbi dyzet – por sepse e dimë që jemi të pafajshëm, e dimë që nuk kemi bërë asgjë të kundërligjshme dhe e dimë që si përfaqësues politikë vendi ynë ka qenë pranë popullit tonë – atëherë, sot dhe do të jetë edhe nesër. Përfaqësuesit politikë serbë nuk e kanë atë mundësi si disa përfaqësues politikë shqiptarë që të refuzojnë thirrjet e prokurorisë, sepse neve na kanoset paraburgimi, arrestimi dhe gjithçka tjetër që iu është bërë dhjetëra serbëve gjatë periudhës së kaluar,” tha Simiq.

Ai theksoi se po shkon në dëgjimin me kokën lart sepse e di që nuk kanë bërë asgjë të kundërligjshme dhe kanë qenë me popullin e tyre.

“Kjo është edhe një provë tjetër se si komuniteti ndërkombëtar i kupton detyrimet e veta ndaj popullit serb. Që në vitin 1999 u proklamua karakteri multietnik i Kosovës dhe Metohisë. Deri më sot kjo nuk është respektuar, dhe serbët janë çdo ditë e më pak. Në vitin 2013 na u premtua Asociacioni i komunave Serbe – deri më sot nuk ka ndodhur. Gjithçka që është përcaktuar në marrëveshjet ndërkombëtare, pas të cilave qëndruan edhe BE-ja edhe Kombet e Bashkuara, nuk është zbatuar në praktikë, veçanërisht kur bëhet fjalë për mbrojtjen e interesave të serbëve dhe përmirësimin e pozitës së popullit serb në këto hapësira,” përfundoi Simiq.