Vasiq: Kërkojmë mbrojtjen e ligjshmërisë para Gjykatës Supreme për shkak të paraburgimit të Trajkoviqit

Avokati Dejan Vasiq, i cili përfaqëson Sllagjan Trajkoviqin nga Mitrovica e Veriut, i dyshuar për kryerjen e supozuar të krimit të luftës, sot ka parashtruar kërkesë për mbrojtje të ligjshmërisë në Gjykatën Supreme të Kosovës, për shkak se gjykata në Prishtinë ka nxjerrë sërish vendim për vazhdimin e masës së paraburgimit gjyqësore.

“Që nga fillimi, procedurat ndaj z.Trajkoviq janë zhvilluar me shkelje të rënda të ligjit nga Prokuroria Speciale duke i zhvilluar hetimet pa lejen e mbrojtjes për të marrë pjesë në hetim. Për klientin tim kam kërkuar nga Gjykata Supreme lehtësimin e masave, për arsye shëndetësore dhe në përputhje me praktikën e deritanishme për këto vepra penale ndaj banorëve të Kosovës”, tha Vasiq.

Trajkoviq u arrestua më 15 dhjetor në Mëhallën e Boshnjaçkëve në Mitrovicën e Veriut nën dyshimin se ka marrë pjesë në një krim lufte. Në fillim të nëntorit të vitit të kaluar, së bashku me kolegë të tjerë, ai u largua nga Policia e Kosovës në shenjë proteste ndaj dhunës që autoritetet në Prishtinë po ushtrojnë ndaj serbëve në veri.