Vuçeviq: Plagosja e Jovanoviqit është sulmi i 38-të ndaj serbëve këtë vit, dhe bashkësia ndërkombëtare po hesht

Ministri i Mbrojtjes Millosh Vuçeviq ka thënë sot se plagosja e Millan Jovanoviqit, i cili u plagos të hënën në mbrëmje në afërsi të urës së Bistricës, jo larg nga Zveçani, është sulmi i 38-të ndaj serbëve në Kosovë këtë vit, dhe 276-ti, që kur kryeministër është Albin Kurti, transmeton RTV.

“Së pari kemi dëgjuar historinë që askush nuk qëlloi, se nuk e dinë se çfarë ka ndodhur, tani kanë ardhur deri aty sa për këtë kanë ndaluar katër policët e tyre. Së pari, kishim një deklaratë nga KFOR-i se nuk e dinin se policia e Kosovës kishte qëlluar, se pas 24 orësh do ta njoftonin ushtrinë serbe se kishin dijeni se policia e Kosovës kishte qëlluar në Millan Jovanoviq”, deklaroi Vuçeviq për TV Pink.

Ai shtoi se serbët në Kosovë me të drejtë janë të zemëruar dhe të indinjuar për gjithçka që po u ndodh, por se mbi të gjitha kanë frikë për sigurinë e tyre dhe sigurinë e familjes së tyre.

Ai ka thënë se organizatat ndërkombëtare heshtin për gjithçka që ndodh në territorin e Kosovës, si dhe organizatat joqeveritare në Serbinë qendrore që merren me të drejtat dhe liritë e njeriut.

Vuçeviq pyeti BE-në se sa kohë duhet për formimin e Bashkësisë së Komunave Serbe dhe çfarë do të ndodhë me marrëveshjet për të cilat ata kanë dhënë garanci se do të zbatohen.

Ai iu referua edhe vizitës së djeshme në Sjenicë, ku i bëri homazhe rreshterit Ivan Vasoviq, i cili vdiq në moshën 24 vjeçare në Koshare dhe vizitoi familjen Vasoviq.

Vuçeviq theksoi se Serbia është e përkushtuar për ruajtjen e paqes dhe shprehu dëshirën që asnjë familje në Serbi të mos kalojë atë që ka kaluar familja Vasoviq, por as për të harruar dhe as “për të hedhur hije mbi sakrificën e bërë nga heronjtë nga Kosharja”.

"Të mos harrojmë ata njerëz që dhanë jetën për Serbinë. Prandaj jam krenar që presidenti Vuçiç ua riktheu kulturën e përkujtimit, të gjithë atyre njerëzve që sakrifikuan veten për vendin tonë", tha Vuçeviq.

Vuçeviq ftoi të gjithë qytetarët që të vijnë në aeroportin e Batajnicës më 22 prill për të marrë pjesë në rishikimin e tehnikëve ushtarake, dhe shtoi se do të jetë prezantimi më i madh i gjithçkaje që ka ushtria serbe.