Vuçeviq: Vuçiq e ka mbështetje të parezervë në luftën për Kosovën

Ministri i Mbrojtjes Millosh Vuçeviq i ofroi presidentit serb Alleksandar Vuçiq mbështetje të parezervë për të qëndruar në presionin dhe sulmet e vazhdueshme për shkak të Kosovës, çështjes historikisht më të rëndësishme serbe.

Vuçeviq ka deklaruar në llogarin e tij në Instagram se Vuçiq është vazhdimisht në shënjestër të tradhtarëve për shkak të luftës së tij për përmirësimin e vendit të tij.

“Sot nuk është e lehtë të luftosh për Serbinë, të luftosh për progresin e saj duke u marrë me politikën. Alleksandar Vuçiq pikërisht sepse po punon për të mirën e vendit të tij, është vazhdimisht në shënjestër të tradhtarëve, mercenarëve dhe të gjithë atyre që vendosin interesat e tyre përpara atyre të shtetit. Presidenti i Serbisë e ka mbështetjen time të parezervë për të qëndruar në presionet dhe sulmet e vazhdueshme që vijnë edhe për shkak të çështjes historikisht më të rëndësishme serbe – Kosovës”, thotë Vuçeviq.

Ai theksoi se dorëzimi nuk është një opsion.