Vuçiq bisedoi me presidentin e Francës; Makron: Dënojmë veprimet e njëanshme që dëmtojnë dialogun mes Serbisë dhe Kosovës

Presidenti i Serbisë, Aleksandar Vuçiq, ka zhvilluar sot një bisedë telefonike me presidentin e Francës, Emanuel Makron, mbi marrëdhëniet bilaterale dhe çështjet rajonale, me theks të veçantë mbi zhvillimet në Bosnjë e Hercegovinë dhe në Kosovë. Makron theksoi se Franca i kushton rëndësi stabilitetit, unitetit dhe sovranitetit të Bosnjë e Hercegovinës, si dhe respektimit të sundimit të ligjit, duke nënvizuar gjithashtu rëndësinë e dialogut ndërmjet Serbisë dhe Kosovës dhe duke dënuar çdo veprim të njëanshëm që mund ta dëmtojë atë.

“Sapo bisedova me presidentin Vuçiq. E përsërita bindjen time se e ardhmja e Serbisë është në Evropë dhe shpresën se ajo mund të përparojë, në frymën e dialogut, përmes reformave dhe procesit të anëtarësimit. Rishikuam marrëdhëniet mes Serbisë dhe Francës dhe vendosëm t’i forcojmë më tej bashkëpunimet tona,” shkroi Makron në rrjetin social “X”.

Ai shtoi se kanë diskutuar për situatën në rajon.

“Theksova rëndësinë që Franca i jep stabilitetit, unitetit dhe sovranitetit të Bosnjë e Hercegovinës, si dhe respektimit të sundimit të ligjit. E përsërita rëndësinë e dialogut ndërmjet Serbisë dhe Kosovës dhe dënimin tonë për çdo veprim të njëanshëm që mund ta dëmtojë atë,” u shpreh Makron.

Me vendet e Ballkanit Perëndimor, Evropa do të realizojë fatin e saj – në unitet, solidaritet dhe përgjegjësi.

Presidenti i Serbisë, Aleksandar Vuçiq, deklaroi se ka pasur një bisedë miqësore dhe të hapur me presidentin e Francës, Emanuel Makron.

“Bisedë miqësore dhe e hapur me presidentin Emanuel Makron për marrëdhëniet bilaterale dhe çështjet rajonale, veçanërisht në dritën e zhvillimeve aktuale në Bosnjë e Hercegovinë dhe në Kosovë e Metohi,” shkroi Vuçiq në Instagram.

Ai bëri të ditur se gjatë bisedës theksoi se Serbia mbetet e përkushtuar ndaj të gjitha proceseve që synojnë ruajtjen e paqes, bashkëpunimin dhe mirëqenien, duke përsëritur se zhvillimi i vendit, mirëqenia dhe mbrojtja e popullit serb janë interesat tona kombëtare thelbësore.

Vuçiq theksoi përkushtimin e Serbisë ndaj dialogut dhe respektimit të së drejtës ndërkombëtare, si dhe gatishmërinë për të kontribuar në stabilitetin afatgjatë të rajonit.

“Falënderova presidentin Makron për angazhimin e tij personal në çështjet që kanë të bëjnë me Ballkanin Perëndimor, si dhe për mbështetjen e vazhdueshme që Franca i jep Serbisë në rrugën e saj drejt Bashkimit Evropian, dhe e ftova të vizitojë Serbinë,” shtoi Vuçiq.