Vuçiq: E njoftova Hillin për situatën gjithnjë e më të vështirë të serbëve në Kosovë e Metohi

Presidenti i Serbisë, Aleksandar Vuçiq, ka njoftuar sot Ambasadorin e Shteteve të Bashkuara të Amerikës, Kristofer Hill, për situatën dhe sfidat gjithnjë e më të vështira me të cilat përballet populli serb në Kosovë.

“Vuçiq tha se situata për serbët që jetojnë në Kosovë po bëhet gjithnjë e më e vështirë, se ata janë të ekspozuar pothuajse çdo ditë ndaj sulmeve, arrestimeve dhe presioneve të tjera dhe vuri në dukje pakënaqësinë në rritje të popullit për shkak të veprimeve të njëanshme dhe të paligjshme të autoriteteve të përkohshme vetëqeverisëse në Prishtinë dhe mungesës së reagimeve adekuate të bashkësisë ndërkombëtare”, thuhet në komunikatën e Presidencës së Serbisë.

Siç shtohet, Vuçiq ka theksuar se Serbia, si edhe më parë, do të vazhdojë t'i zgjidhë të gjitha çështjet e hapura përmes politikës së përgjegjshme dhe dialogut për të përmirësuar jetën e qytetarëve të saj dhe shtoi se pret mbështetjen e SHBA-së në të gjitha përpjekjet që synojnë ruajtjen e paqes dhe stabilitetit në rajon dhe arritjen dhe zbatimin e marrëveshjeve të qëndrueshme me Prishtinën, që para së gjithash i referohet formimit të Bashkësisë së Komunave Serbe.

Vuçiq diskutoi gjithashtu bashkëpunimin rajonal dhe çështjet dypalëshe me Hillin. Hilli theksoi se Shtetet e Bashkuara dhe partnerët e saj nga Bashkimi Evropian do të vazhdojnë të avokojnë për një dialog që do të sjellë rezultate konkrete dhe ritheksoi mbështetjen e SHBA-së për integrimin evropian dhe zhvillimin e Serbisë dhe rajonit.

Bashkëbiseduesit ranë dakord se ruajtja e paqes dhe stabilitetit në Ballkanin Perëndimor është e një rëndësie vendimtare dhe shtuan se prosperiteti dhe lidhja ekonomike mund të jetë një ndihmë e madhe në eliminimin e problemeve politike.

Pas takimit, Vuçiq ka postuar edhe në Instagram në profilin buducnostsrbijeav.

“E njoftova ambasadorin Hill për situatën dhe sfidat gjithnjë e më të vështira me të cilat përballet populli ynë në Kosovë e Metohi dhe përsërita shqetësimin tim për sulmet, arrestimet dhe presionet e tjera të shpeshta ndaj të cilave janë të ekspozuar serbët. Republika e Serbisë po përpiqet të ruajë paqen me një politikë konsistente dhe të përgjegjshme dhe për të siguruar jetë më të sigurt dhe më të lehtë për të gjithë qytetarët, me respektimin dhe zbatimin e së drejtës ndërkombëtare dhe të dakorduar në dialogun me Prishtinën, dhe i kërkova ambasadorit Hill mbështetjen dhe angazhimin e plotë të SHBA-ve në këtë rrugë", ka thënë Vuçiq.