Vuçiq me Pauer: Nuk pranojmë vendime të njëanshme që kërcënojnë drejtpërdrejt të drejtat e serbëve në Kosovë e Metohi

Presidenti i Serbisë, Aleksandar Vuçiq, është takuar me administratoren e USAID-it, Samanta Pauer dhe me atë rast ka diskutuar për gatishmërinë e Serbisë për të vazhduar dialogun me Prishtinën, por edhe për mospranimin e vendimeve të njëanshme që do të kërcënonin të drejtat e serbëve në Kosovë e Metohi.

Me rastin e këtij takimi, presidenti Aleksandar Vuçiq ka njoftuar në Instagram se një nga temat ka qenë përmirësimi i bashkëpunimit dypalësh dhe ekonomik me Shtetet e Bashkuara të Amerikës.

“Një bisedë e rëndësishme, e hapur dhe kuptimplotë me Samanta Pauer për tema specifike dhe prioritare për përmirësimin e mëtejshëm të bashkëpunimit dypalësh dhe ekonomik me SHBA-në, por edhe për situatën në rajon dhe sfidat aktuale gjeopolitike rajonale dhe globale”, ka shkruar ai.

Ai theksoi gatishmërinë e vazhdueshme të Serbisë në procesin e mëtutjeshëm të dialogut me Prishtinën, duke theksuar se shteti nuk do të pranojë vendime të njëanshme që mund të rrezikojnë serbët nga Kosova.

“Përsërita gatishmërinë e vazhdueshme të Serbisë për të vazhduar dialogun me Prishtinën, por edhe vendosmërinë për të mos pranuar asnjë vendim të njëanshëm që kërcënon drejtpërdrejt të drejtat e komunitetit serb në Kosovë e Metohi”, ka theksuar Vuçiq.

Së bashku me letrën falënderuese, presidenti i Serbisë shtoi se janë shqyrtuar edhe investime të mundshme që do të përmirësojnë progresin e gjithanshëm të vendit.

“Falënderova për ndihmën që USAID-i i dha vendit tonë përmes programeve të tij në sferën e forcimit të konkurrencës së ekonomisë serbe, si dhe kemi konsideruar potencialin për investime shtesë në infrastrukturën energjetike dhe fillimin e projekteve të reja me qëllim të përparimit ekonomik gjithëpërfshirës dhe uniform të Serbisë”, tha Vuçiq.