Vuçiq me Quint-ën: Shpresoj se do të arrini ta bindni Kurtin të tërheqë forcat dhe kryetarët personalë nga veriu

Presidenti i Serbisë, Aleksandar Vuçiq, ka takuar sot përfaqësuesit e vendeve të Quint-ës dhe shefin e delegacionit të BE-së, me të cilët ka biseduar për zhvillimet aktuale në Kosovë.

Siç thuhet në komunikatën e Presidencës së Serbisë, Vuçiq ka shprehur pakënaqësi të madhe dhe shqetësim të madh për faktin se një pjesë e bashkësisë ndërkombëtare vazhdon të tolerojë lëvizjet e njëanshme të Prishtinës, të cilat çojnë në dhunë kundër komunitetit serb, që si tha ai, ka si pasojë një rënie të numrit të opsioneve që mund të çojnë në paqe dhe stabilitet të përhershëm në rajon.

Presidenti Vuçiq i njoftoi bashkëbiseduesit për kronologjinë e vërtetë të ngjarjeve të djeshme, në të cilat u plagosën një numër i madh i pjesëtarëve të komunitetit serb, të cilët u mblodhën për të shprehur pakënaqësinë e tyre për depërtimin e forcave ilegale të Kurtit në objektet serbe, por edhe për shkak të besimit të lëkundur në KFOR-in, i cili përkundër garancive të dhëna, nuk i mbrojti serbët dhe nuk pengoi marrjen e paligjshme dhe të dhunshme të komunave.

Ai përkujtoi se kishte paralajmëruar me kohë dhe me këmbëngulje për këtë zhvillim të situatës, si dhe për pasojat që mund të çojnë në mosndëshkimin e institucioneve në Prishtinë, të cilat jo vetëm që nuk i përmbushin obligimet e tyre, por rregullisht ndërmarrin veprime të njëanshme të dhunshme kundër komuniteti serb në Kosovë e Metohi, me incidente të shumta dhe të shpeshta, me pasojë lëndime, rrahje, keqtrajtime dhe diskriminim të hapur të serbëve.

Presidenti Vuçiq tha se është koha që një pjesë e bashkësisë ndërkombëtare më në fund të reagojë ashpër, qartë dhe pa mëdyshje ndaj politikave të institucioneve të Prishtinës dhe të mbrojë serbët nga presionet gjithnjë e më të forta dhe dhuna që kryhet në pamje të plotë të të gjithë mekanizmave, roli i të cilëve, ndër të tjera, është mbrojtja e komunitetit.

Ai shprehu keqardhjen për ushtarët e lënduar të KFOR-it, por theksoi se një numër shumë më i madh i serbëve janë lënduar, se kundër tyre është përdorur armë zjarri dhe forcë e madhe fizike, edhe pse që nga fillimi kanë bërë rezistencë jo të dhunshme. Presidenti Vuçiq shtoi se në situatën aktuale ruajtja e paqes është me rëndësi kyçe, por edhe se gjëja më e rëndësishme është siguria e komunitetit serb në Kosovë e Metohi, si dhe në këtë kuptim ai pret që vendet e Quint-it, të cilat kanë ndikimin më të madh në Prishtinë, të miratojnë dhe zbatojnë urgjentisht disa masa që do të garantonin sigurinë e serbëve në Kosovë e Metohi, e cila është parakusht për çdo diskutim të mëtejshëm me përfaqësuesit e institucioneve të përkohshme në Prishtinë.

Presidenti Vuçiq theksoi se Albin Kurti duhet të tërheqë njësitë e tij speciale, sepse serbët nuk do ta pranojnë kurrë pushtimin e tij.

“Shpresoj se do të jeni në gjendje ta bindin Kurtin për të tërhequr forcat e tij dhe kryetarët personalë nga veriu”, tha presidenti Vuçiq.

Ai theksoi se Serbia do të vazhdojë komunikimin me përfaqësuesit e NATO/KFOR-it në besimin më të mirë për të ruajtur paqen dhe stabilitetin.

Ambasadorët e Quint-it dhe shefi i delegacionit të BE-së në Serbi shprehën shqetësimin për përshkallëzimin e dhunës dhe sulmet ndaj ushtarëve të KFOR-it. Ata kërkuan rikthim në dialog për të gjetur një rrugëdalje politike nga situata.

Vuçiq ka postuar edhe në llogarinë në Instagram “buducnostsrbijeav” ku ka shkruar se gjatë takimit ka theksuar se lëvizjet e njëanshme të Prishtinës çojnë në dhunë ndaj komunitetit serb.

"Kjo na largon nga paqja dhe stabiliteti i qëndrueshëm në rajon. Tërheqja urgjente e kryetarëve të rrejshëm të komunave dhe pjesëtarëve të të ashtuquajturave forca speciale policore të Prishtinës është kusht për ruajtjen e paqes në Kosovë e Metohi", tha presidenti Vuçiq.