Vuçiq me Rugen: Jemi të shqetësuar për tendencën për të komplikuar situatën në Kosovë

Presidenti i Serbisë Aleksandar Vuçiq ka biseduar sot me Ndihmës Sekretarin e Përgjithshëm të NATO-s për Çështje Politike dhe Politikë të Sigurisë Boris Ruge për situatën në rajon, sigurinë në Kosovë dhe implikimet e lëvizjeve të njëanshme të autoriteteve të Prishtinës.

“Një takim i mirë me Boris Ruge për çështjet më të rëndësishme, situatën në rajon, sigurinë në Kosovë dhe Metohi dhe për implikimet e mundshme të vazhdimit të lëvizjeve të njëanshme të regjimit të Kurtit”, ka thënë Vuçiq në Instagram.

Siç shtoi ai, gjatë takimit ai shprehu shqetësim të madh për tendencën për të komplikuar situatën në Kosovë përkundër të gjitha përpjekjeve të Beogradit për t'i kthyer çështjet e hapura në kornizën e dialogut.

"Gjithashtu, theksova se rreziku i vazhdueshëm i përshkallëzimit të tensioneve, të cilin Prishtina e provokon rregullisht me vendime dhe sjellje të papërgjegjshme, ka një ndikim të madh te populli serb në KdheM, i cili jeton në gjendje të frikës së vazhdueshme për jetën dhe pronën”, theksoi ai.

Vuçiq e falënderoi Rugen për vëmendjen që i kushton kësaj çështjeje, pasi që ai vetë është njohës i mirë i situatës në Kosovë.

“Theksova se është e nevojshme të intensifikohen përpjekjet diplomatike dhe të koordinohen me forcat e KFOR-it në përputhje me Rezolutën 1244 dhe kompetencat që ato forca kanë si pjesë të mandatit të tyre në mënyrë që të sigurohet sigurinë e serbëve në Kosovë dhe Metohi, kthimin e Prishtinës në dialog dhe përmbushjen e të gjitha obligimeve dhe mbi të gjitha formimin e BKS-së”, tha Vuçiq.

Gjatë bisedës me Rugen, presidenti ka theksuar se Serbia mbetet e përkushtuar ndaj neutralitetit ushtarak.

Ruge ka deklaruar në rrjetin social “X” se biseda me presidentin Vuçiq për marrëdhëniet NATO-Serbi, të cilat shpreson se do të thellohen, ka qenë e mirë.

“Ne diskutuam edhe çështjet rajonale, duke përfshirë sigurinë e përhershme në Kosovë. NATO pret që Serbia të ndihmojë në sigurimin e përgjegjësisë së plotë për aktet e dhunshme në maj dhe shtator 2023”, tha Ruge.